Salmo 88 - Marahay na Bareta Biblia

Pamibi sa Paghagad nin Tabang

¹ Kagurangnan kong Dios, sa aldaw ako minaapod saimo; asin sa banggi minaagrangay ako sa atubang mo.

² An sakong pamibi makaabot logod saimo; hinanyoga an inagrangay ko.

³ Huli ta an sakong kalag pano nin kasakitan; an sakong buhay harani na sa kagadanan.

⁴ Kabilang ako sa mga minapasiring sa kalot; ako sarong lalaki na mayo na nin kosog,

⁵ siring sa tawong binayaan sa tahaw nin mga gadan; arog sa sarong ginadan na nahuhutad sa lulubngan; arog sa mga tawong dai mo na nagigiromdoman, huli ta dai mo na inaataman.

⁶ Itinapok mo ako sa kairaroman kan lulubngan, sa pinakamadiklom saka pinakahararom na kalot.

⁷ Nagagabatan ako kan saimong kaanggotan; nalalamos ako kan saimong mga alon.

⁸ Ginibo mong bayaan ako kan sakong mga katood; para sainda ako sarong bagay na nakakatakot. Ako nabibilanggo asin dai makakadulag;

⁹ nagluluya an sakong mga mata huli sa kamondoan. Aroaldaw nag-aapod ako saimo, Kagurangnan; iniitaas ko sa pagpamibi an sakuyang mga kamot.

¹⁰ Naggigibo ka daw nin milagro para sa mga gadan? Mabangon daw an mga anino sa pagtao saimo nin kaomawan?

¹¹ An danay mong pagkamoot irinurukyaw daw sa lulubngan, sa lugar nin padusa an saimong kaimbodan?

¹² Midbid daw sa lugar nin kadikloman an saimong ngangalasan, o sa daga nin mga nalingawan an saimong kaligtasan?

¹³ Alagad, Kagurangnan, minaagrangay ako saimo; aga-aga namimibi ako saimo.

¹⁴ Kagurangnan, tadaw ta isinisikwal mo ako? Tadaw ta tinatago mo sako an lalawogon mo?

¹⁵ Nasasakitan ako asin harani sa kagadanan poon kan aki pa ako. Kapoy na ako sa gabat kan mga padusa mo.

¹⁶ Huminugpa sako an saimong kaanggotan; rinonot ako kan mangirhat mong mga salakay.

¹⁷ Siring sa baha, pinalibotan ako kaini sa bilog na aldaw; dinaguso ninda akong sarabay.

¹⁸ Ginibo mong bayaan ako kan sakong katood asin namomotan; an kadikloman iyo na sana an sakong kaibahan.