Salmo 83 - Marahay na Bareta Biblia

Pamibi tanganing Madaog an mga Kaiwal nin Israel

¹ O Dios, dai ka mag-alo; dai magsa-daing labot, magsa-daing pagmakulog.

² Uya, nagriribok an saimong mga kaiwal; nagrerebelde an mga naoongis saimo.

³ Nagpaplano sinda nin karatan tumang sa saimong banwaan; nagtitiripon tumang sa saimong mga iniingatan.

⁴ Olay ninda, “Madya, puhoon ta an saindang nasyon, tanganing an Israel dai na nanggad giromdomon.”

⁵ Nagkakaoroyon sinda sa saindang plano; naggigibo nin tipan tumang saimo;

⁶ an mga taga Edom saka mga Ismaelita; an mga taga Moab saka mga Agareno;

⁷ mga taga Gebal, Ammon asin Amalek; mga Filisteo asin an mga taga Tiro.

⁸ Nagsarabay man sainda an mga taga Asiria; makokosog sindang kaapil kan kapagarakian ni Lot.

⁹ Giboha sainda an ginibo mo sa mga Midianita; ki Sisera asin ki Jabin duman sa salog nin Kison.

¹⁰ Dinaog mo sinda duman sa Endor, asin an saindang mga bangkay nalapa sa daga.

¹¹ An mga lider ninda iarog mo ki Oreb saka ki Zeeb; an mga prinsipe ninda iarog mo ki Zeba asin ki Zalmunna,

¹² na nagsarabi, “Satuyang sadirihon an mga pasabsaban nin Dios.”

¹³ Dios ko, iwarak mo sinda siring sa alpog; siring sa ata na ipinapalid nin doros.

¹⁴ Siring sa kalayo na nakakatunaw sa kadlagan; siring sa kalayo na nakakaraot nin kabukidan;

¹⁵ lamaga sinda kan saimong aripuros; takota sinda kan makosog mong doros.

¹⁶ An saindang lalawogon panoa nin sopog, Kagurangnan; tanganing apodon ninda an saimong ngaran.

¹⁷ Mapasopog logod sinda asin manluya sagkod pa man; magadan logod sinda sa kasopogan.

¹⁸ Masabotan logod ninda na ika sana an Kagurangnan; na ika an orog kahalangkaw sa bilog na kinaban.