Salmo 80 - Marahay na Bareta Biblia

Pamibi Tanganing Patindogon Giraray an Nasyon

¹ Dangoga kami, O Pastor nin Israel; himatea kami, ika na pamayo kan saimong mga karnero. Ika na nakatukaw sa trono sa ibabaw kan mga kerubin,

² magpahiling ka sa mga tribu ni Efraim, Benjamin asin Manases. Ipahiling mo an saimong kosog, asin madya sa pagligtas samo.

³ O Dios, ibalik mo kami; pahilingan samo an saimong pagkaherak, asin kami makakaligtas.

⁴ O Kagurangnan, Dios nin mga hukbo, sagkod nuarin ka maaanggot sa pamibi kan saimong banwaan?

⁵ Pinakakan mo kami kan tinapay nin kamondoan; pinainom mo nin luha sa dakulang lalagan.

⁶ An samuyang daga pinag-iiwalan kan samong mga kataed, pinagngingisihan kami kan samong mga kalaban.

⁷ O Dios nin mga hukbo, ibalik mo kami; pahilingan samo an saimong pagkaherak, asin kami makakaligtas.

⁸ Sarong ubasan kinua mo hale sa Egipto; pinahale mo an mga nasyon asin itinanom idto.

⁹ Saimong hinawanan an lugar na tataluboan; kaya nakagamot asin nakalakop sa daga an ubasan.

¹⁰ Natahoban kan limpoy kaini an kabukidan; natahoban man kan saiyang mga sanga an darakulang mga sedro.

¹¹ An mga sanga kaini nakaabot sa Dagat nin Mediteraneo; nakaabot man sagkod sa Salog nin Eufrates.

¹² Tadaw ta rinumpag mo an saiyang mga kudal? Kaya ngunyan gabos na minaagi nagpupudo kan saiyang mga bunga.

¹³ Sinusungkal kan opon sa kadlagan, sinasabsab kan mga hayop sa kapatagan.

¹⁴ O Dios nin mga hukbo, kilingan mo kami! Dumungaw ka hale sa langit asin hilinga kami! Atamana ining ubasan,

¹⁵ an banwaan na itinanom kan saimong kamot, pinatalubo sagkod na pumusog.

¹⁶ Sinulo iyan nin mga kaiwal asin pinalod; hilinga sinda asin tunawa kan saimong kaanggotan.

¹⁷ Alagad suroga asin atamana an banwaan na pinili mo, an nasyon na pinakosog mong gayo.

¹⁸ Dai mi na nanggad ika tatalikdan. Tawe kami nin buhay, asin aapodon mi an saimong ngaran.

¹⁹ Kagurangnan, Dios nin mga hukbo, ibalik mo kami; pahilingan samo an saimong pagkaherak, asin kami makakaligtas.