Salmo 79 - Marahay na Bareta Biblia

Pamibi Tanganing Iligtas an Nasyon

¹ O Dios, an saimong daga linaog kan mga pagano; pinagbasang-basang ninda an banal mong Templo; rinumpag ninda an Jerusalem.

² Ipinakakan ninda sa mga gamgam an bangkay kan saimong mga sorogoon; an hawak kan saimong mga banal itinao sa mga lalaw na hayop bilang kakanon.

³ Pinabulos ninda siring sa tubig an dugo kan saimong banwaan; nagbulos na garo tubig sa bilog na Jerusalem, asin mayong nawalat na malubong kan mga gadan.

⁴ Nagin ngingisihan kami kan samuyang mga kataed; pinag-olog-olog saka pinagtuya-tuya kan mga nasa palibot nyamo.

⁵ Sagkod nuarin, Kagurangnan? Maaanggot ka daw sagkod lamang? Padagos daw na maglalaad siring sa kalayo an saimong kaanggotan?

⁶ Ulaan an saimong kaanggotan sa mga nasyon na dai nakakamidbid saimo, sa mga kahadean na dai nag-aapod kan ngaran mo.

⁷ Huli ta ginadan ninda si Jacob, asin rinaot ninda an saiyang erokan.

⁸ Dai mo kami pagpadusahan huli sa kasalan kan samong mga ginikanan; madya sa pagtabang samuya ngunyan, huli ta nawawaran kami nin paglaom.

⁹ Tabangi kami, O Dios nin samuyang kaligtasan, huli sa kamurawayan nin saimong ngaran. Ligtasan kami asin patawada an samong mga kasalan, huli kan saimong ngaran.

¹⁰ Tano ta maghapot an mga nasyon, “Haen an saindang Dios?” Mahiling mi logod an pagsingil asin pagpadusa mo sa mga nasyon, huli ta pinabulos ninda an dugo kan saimong mga sorogoon.

¹¹ Dangoga an inagrangay kan mga nasa bilanggoan; asin huli kan saimong dakulang kapangyarihan, ligtasan an mga nahatolan na magadan.

¹² An ibang nasyon makapitong beses mong padusahan, huli kan pagtuyatuya ninda saimo, Kagurangnan.

¹³ Dangan kami na saimong banwaan, mga karnero na saimong ataman, magpapasalamat saimo sagkod pa man; ika samong oomawon sa gabos na kapagarakian.