Salmo 76 - Marahay na Bareta Biblia

An Mapangganang Dios

¹ An Dios midbid sa Juda; bantog sa Israel an saiyang ngaran.

² An saiyang harong yaon sa Jerusalem, nag-eerok siya sa Bukid nin Sion.

³ Duman saiyang binari an mga pana, mga kalasag, mga espada, asin an mga armas nin gera.

⁴ Ika, O Dios, mamurawayon, orog na magayon ki sa kabukidan na daing kataposan.

⁵ An maiisog nindang soldados binawian kan saindang sinamsam, asin ngunyan nagkakatorog sa kagadanan; gabos nindang kosog asin kahusayan mayo nin kamugtakan.

⁶ Sa saimong pagtuyaw, O Dios ni Jacob, an lunad asin an kabayo parehong nagadan.

⁷ Alagad ika, Kagurangnan, kinatatakotan kan gabos. Mayo nin makakaatubang saimo kun ika anggot.

⁸ Ipinahayag mo an paghukom hale sa langit; natakot an daga asin dai naggirong,

⁹ kan ika magtindog sa paghukom, tanganing iligtas an gabos na naaapi sa daga.

¹⁰ An kaanggotan nin tawo magtatao nin kaomawan saimo; an makaligtas sa gera iyo an maselebrar kan saimong mga pyesta.

¹¹ Otobon nindo sa Kagurangnan na saindong Dios, an saindong panuga saiya. Gabos na nasyon sa palibot magdara nin mga dolot sa saiya na maninigong katakotan,

¹² na minaputol kan hinangos nin mga prinsipe, na minatakot sa mga hade nin daga.