Salmo 75 - Marahay na Bareta Biblia

An Dios iyo an Hukom

¹ Nagpapasalamat kami saimo, O Dios, nagpapasalamat kami saimo! Inaapod mi an saimong ngaran, asin ibinabareta an mga gibo mong ngangalasan.

² Nagtaram an Dios, “Sa itinalaan kong panahon mahukom ako na may katanosan.

³ Maski magtakig an kinaban asin an gabos na yaon diyan, pupugolon ko an mga harigi kaiyan.

⁴ Tinataraman ko an mga mapaabaw-abaw na dai maghambog;

⁵ tinataraman ko an mga tampalasan na ontokon an saindang kahambogan.”

⁶ An paghukom dai minagikan sa sirangan o sa solnopan, ni sa mga kalangtadan o kabukidan;

⁷ kundi sa Dios na iyo an hukom, an nagpapadusa sa saro asin nagpapatalingkas sa iba.

⁸ Kapot nin Kagurangnan an sarong kalis, pano nin maisog na arak nin saiyang kaanggotan. Iuula niya iyan, asin iinomon kan gabos na tampalasan; iinomon sagkod na maubos.

⁹ Alagad dai ako maontok sa pagrukyaw kan Dios ni Jacob; maawit ako nin kaomawan sa saiya.

¹⁰ Roronoton niya an kapangyarihan kan mga maraot, alagad dudugangan niya an kapangyarihan kan mga matanos.