Salmo 74 - Marahay na Bareta Biblia

Pamibi Tanganing Iligtas an Nasyon

¹ O Dios, tadaw ta isinisikwal mo kami sagkod lamang? Tano ta anggot ka sa mga karnero na saimong ataman?

² Giromdoma an saimong banwaan, na kaidtong panahon pinili mo para saimo; na tinubos mo sa kaoripnan tanganing magin sadiring tribu. Giromdoma an Bukid nin Sion na saimong dating pinag-erokan.

³ Maglakaw ka sa mga lugar na narumpag na gayo; rinaot kan mga kaiwal an gabos na nasa laog kan Templo!

⁴ Nagkurahaw sa laog kan Templo an saimong mga kaiwal; nagpatindog nin mga bandera duman bilang tanda nin panggana.

⁵ Pinatok ninda an mga pintoan, siring sa mga parapalod nin kahoy.

⁶ Rinaot ninda an mga sinamnohan na lanob, sa paagi nin mga patok saka martilyo.

⁷ Sinulo ninda an saimong Templo; rinumpag, dai ginalangan an saimong pinag-eerokan.

⁸ Nagsaboot sinda, “Ronoton nyato sinda”; sinulo ninda an gabos na santwaryo nin Dios sa daga.

⁹ Mayo na an samong mga banal na tanda; mayo ni sarong propetang natada; asin mayong nakakaaram kun sagkod nuarin an siring na kamugtakan.

¹⁰ Sagkod nuarin, O Dios, magtutuya-tuya an kaiwal? Mag-oolog-olog daw sinda sagkod lamang kan saimong ngaran?

¹¹ Tano ta pinupugol mo an saimong kamot? Tano ta nagsasayuma ka sa pagtabang samo?

¹² Alagad poon kaidto ika na an samuyang Hade, O Dios; dakul nang beses mo kaming ilinigtas.

¹³ Binanga mo an dagat kan saimong kosog; rinonot mo an payo kan mga dragon sa katubigan.

¹⁴ Rinonot mo an mga payo kan Leviatan; itinao mo bilang pagkakan sa mga hayop sa kadlagan.

¹⁵ Pinabulos mo an mga sapa saka burabod; pinamara mo an mga darakulang salog.

¹⁶ Linalang mo an aldaw asin an banggi; ibinugtak mo an aldaw, an bulan saka mga bitoon.

¹⁷ An daga binugtakan mo nin mga kasagkoran; ginibo mo an tig-init saka an tig-uran.

¹⁸ Giromdoma, Kagurangnan, na nginingisihan ka kan mga kaiwal, ikinakaongis ka kan mga tawong masombikal.

¹⁹ An saimong salampati hare pagpabayae sa mga maringis na hayop; hare paglingawe sagkod lamang an buhay kan saimong mga dukha.

²⁰ Giromdoma an tipan na ginibo mo samuya; huli ta pano nin kadahasan an lambang kanto kan daga.

²¹ An mga naapi hare pagpasopogan; an mga dukha asin nangangaipo tugoteng mag-omaw kan saimong ngaran.

²² Tindog, O Dios, asin suroga ako; giromdoma na nginingisihan ka kan kaiwal sa bilog na aldaw.

²³ Hare paglingawe an saindang kinurahaw, an daing ontok na ribok kan saimong mga kaiwal.