Salmo 71 - Marahay na Bareta Biblia

Pamibi kun Gurang na

¹ Sa saimo ako minapaili, Kagurangnan, hare nanggad ako pagpasopogan!

² Sa saimong pagkamatanos ligtasan ako; himatea asin agawa ako!

³ Ika logod an magin sakong gapo na pailihan, sarong makosog na bantayan na maligtas sako; huli ta ika an sakong gapo asin bantayan.

⁴ O Dios, ligtasan ako sa kamot kan tampalasan, sa kamot kan tawong bakong matanos asin tulisan.

⁵ Ika, Kagurangnan, an sakuyang paglaom; sakong pagsarig poon kan ako aki pa.

⁶ Sa saimo ako nagsandig poon kan sakong pagkamundag; sinurog mo poon sa tulak nin sakong ina. Ika danay kong oomawon.

⁷ Ako nagin ngangalasan para sa kadaklan, alagad ika an masarig kong pailihan.

⁸ An sakong ngoso pano kan saimong kaomawan asin kamurawayan sa bilog na aldaw.

⁹ Hare ako pagsikwalan ngunyan na ako gurang na; hare ako pagpabayae ngunyan na ako maluya na.

¹⁰ Ako an pinag-oorolayan kan sakong mga kaiwal. Nagtitiripon an mga boot sakong gumadan.

¹¹ Olay ninda, “Pinabayaan siya nin Dios; lamagon ta siya asin dakopon, huli ta mayo nin maligtas saiya.”

¹² O Dios, dai ka magharayo sako; sakuyang Dios, paghumare sa pagtabang sako!

¹³ Mapasopog logod asin madaog an minasalakay sako; magkasoropog saka mawaran nin dangog an mga boot magkulog sako.

¹⁴ Alagad padagos akong maglalaom saimo, ika orog na oomawon ko.

¹⁵ Ipapahayag kan sakong ngoso an saimong karahayan; an saimong kaligtasan sa bilog na aldaw, maski ngani iyan dipisil kong masabotan.

¹⁶ Oomawon ko an saimong kapangyarihan, O Kagurangnan Dios; mayo akong ipagbabantog kundi an saimong karahayan.

¹⁷ O Dios, poon kan ako aki pa tinukdoan mo na ako, asin padagos na ipagbabantog ko an makangangalas mong mga gibo.

¹⁸ Ngunyan na ako gurang saka ubanon na, O Dios, dai mo ako pagbayaan, sagkod na ikabalangibog ko an saimong kapangyarihan sa gabos na maabot na kapagarakian.

¹⁹ An saimong katanosan, O Dios, nakakaabot sa kalangitan. Mga dakulang ngangalasan an saimong ginibo; mayo nin arog saimo.

²⁰ Pinadarahan mo ako nin mga makuring kasakitan, alagad ako papakosogon mo giraray, babangonon hale sa lulubngan.

²¹ Dudugangan mo an sakuyang kaomawan, asin rarangahon mo ako giraray.

²² Oomawon taka kan sakuyang arpa, huli kan saimong pagkamaimbod, O sakuyang Dios. Aawitan taka nin kaomawan kan sakuyang lira, O Banal na Dios nin Israel.

²³ Sa pag-awit ko kan saimong kaomawan, an sakong ngoso magkukurahaw sa kaogmahan, siring man an kalag ko na saimong tinabangan.

²⁴ Bilog na aldaw an sakong dila magtataram kan saimong katanosan, huli ta nawaran nin dangog asin nasopog, an mga nagmamawot magtao sako nin kulog.