Salmo 69 - Marahay na Bareta Biblia

Panambitan sa Paghagad nin Tabang

¹ Ligtasan ako, O Dios! Huli ta an tubig nakakaabot na sa sakuyang liog.

² Nag-iirarom ako sa laboy, asin mayo nin daga na matutongtongan. Nakakaabot ako sa tubig na hararom, nalalantopan ako kan mga alon.

³ Napapagal na ako sa kahihibi; mamara na an sakuyang halonan. Nagdidiklom na an sakuyang mga mata, sa kahahalat saimo, O Dios.

⁴ An mga naaanggot sako na mayong dahelan, mas dakul pa ki sa sakuyang buhok. Makokosog sinda na boot sakong gumadan; sinasalakay ako kan saindang kaputikan. Dai ko ikakabalik an dai ko man hinabon.

⁵ O Dios, aram mo an sakuyang mga kalolongan; hayag saimo an gabos kong karatan.

⁶ Dai man logod mapasopog huli sako an mga naglalaom saimo, O Kagurangnan, Dios nin mga hukbo! Dai man logod madisonra huli sako an mga naghahanap saimo, O Dios nin Israel!

⁷ Huli saimo, an mga pagduhagi tinitios ko, napano nin kasopogan an lalawogon ko.

⁸ Ako nagin dayuhan sa sakuyang mga tugang, dayuhan sa mga aki nin sakuyang ina.

⁹ An pagkamoot ko sa saimong Templo minalaad siring sa kalayo; an mga pagduhagi saimo minahugpa sako.

¹⁰ Kan ako nagpakumbaba huli sa pag-ayuno, tinuya-tuya ako kan mga tawo.

¹¹ Kan magsulot ako nin gubing sa pagmondo, pinagngisihan ninda ako.

¹² Linilibak ako kan mga nagtutukaw sa may trangkahan; an mga awit kan mga burat ako an pinapatamaan.

¹³ Alagad para sako, mamimibi ako saimo, Kagurangnan. O Dios, sa panahon na saimong pagmarahayon, simbaga ako huli kan danay mong pagkamoot; huli ta ika maimbod sa saimong panuga.

¹⁴ Ligtasan ako sa pag-irarom sa laboy; agawa ako sa sakong mga kaiwal, asin sa mga tubig na hararom.

¹⁵ Hare pagtugot na lantopan ako kan baha; hare pagtugot na halonon ako kan kairaroman, o matambonan sa lulubngan.

¹⁶ Simbaga ako, Kagurangnan, huli ta marahayon an danay mong pagkamoot; lilingya ako huli kan dakula mong pagkaherak.

¹⁷ Hare pagtagoa sa saimong sorogoon an lalawogon mo; huli ta ako nahohorasa, tolos simbaga ako.

¹⁸ Madya sako, tubosa ako, ligtasan ako sa mga kaiwal ko.

¹⁹ Aram mo kun paano ako tinutuya-tuya, sinosopog asin pinapakaraot; midbid mo an gabos kong kaiwal.

²⁰ An puso ko naroronot kan mga pagduhagi, kaya ako nawawaraan nin paglaom. Hinanap ko an pagkaherak, alagad mayo lamang; an mga pararanga, alagad mayo man.

²¹ Hudong an itinao ninda sako bilang kakanon; sa pagkapaha ko, suka an itinao nindang inomon.

²² Magin litag logod an mga bangkete ninda; magin siod an saindang mga banal na pyesta.

²³ Dumiklom logod an saindang mga mata asin mabuta; danay logod na magkubog-kubog an saindang mga tuhod.

²⁴ Iula mo sainda an saimong kaanggotan, aboton logod sinda kan labi-labi mong kaanggotan.

²⁵ Mapabayaan logod an mga kampo ninda, asin mayo nin mag-erok sa saindang mga tolda.

²⁶ Huli ta pinapasakitan ninda an saimong hinampak; kinukulogan pa ninda an saimong linugad.

²⁷ An saindang padusa padagos mong dugangan; hare sinda pagtawe nin kaligtasan.

²⁸ Paraa sinda sa libro kan mga nabubuhay; sa listahan kan mga matanos dai mo sinda ibilang.

²⁹ Alagad ako nasasakitan asin nakukulogan; O Dios, iitaas logod ako kan saimong kaligtasan!

³⁰ Oomawon ko sa sarong awit an ngaran nin Dios; huli sa pagpasalamat, ipagbabantog ko an saiyang kadakulaan.

³¹ An gaweng ini ikakaogma nin Kagurangnan orog pa ki sa pag-atang nin baka, ki sa pagsakripisyo nin dakula nang toro.

³² Maoogma an mga naaapi kun mahiling ini; mabubuhay an mga puso kan naghahanap sa Dios.

³³ Huli ta an mga nangangaipo dinadangog nin Kagurangnan; dai niya isinisikwal an saiyang banwaan na nasa bilanggoan.

³⁴ Omawon siya kan daga asin kalangitan, kan mga dagat asin kan gabos na yaon diyan.

³⁵ Ililigtas nin Dios an Sion, asin giraray papatindogon an mga banwa nin Juda. Duman mag-eerok an saiyang banwaan asin sasadirihon ninda an daga,

³⁶ na magigin pamana kan kapagarakian nin saiyang mga sorogoon, asin erokan kan mga namomoot sa saiyang ngaran.