Salmo 68 - Marahay na Bareta Biblia

Awit nin Panggana kan Nasyon

¹ Tumindog logod an Dios, makawarak logod an saiyang mga kaiwal; dumulag logod an mga naoongis saiya!

² Siring na an aso ipinapalid, alawon mo logod sinda; siring na an taro natutunaw sa kalayo, an tampalasan mapara logod sa atubang nin Dios!

³ Alagad mag-orogma logod an mga matanos; magkururahaw logod sinda sa kaogmahan sa atubang nin Dios!

⁴ Mag-awit sa Dios, mag-awit nin pag-omaw sa saiyang ngaran. Andamon an dalan para sa naglulunad sa mga panganoron. Kagurangnan an saiyang ngaran, mag-ogma sa saiyang atubang!

⁵ Ama nin mga mayong ama asin parasurog nin mga balo; siring kaiyan an Dios sa saiyang banal na Templo.

⁶ An mga mamondo tinatawan niya nin harong na eerokan; an mga bilanggo pinapangenotan niya paluwas pasiring sa kauswagan; alagad mag-eerok sa alang na daga an mga masombikal.

⁷ O Dios, kan pangenotan mo an saimong banwaan, kan naglakaw ka sa kalangtadan,

⁸ naglinog an daga, nag-uran an kalangitan sa presensya nin Dios; naglinog an Sinai sa presensya nin Dios, an Dios nin Israel.

⁹ O Dios, pinauran mo nin makosog asin pinauswag mo an saimong naalang na daga;

¹⁰ duman itinugdok kan saimong banwaan an saindang harong; sa saimong karahayan pinakakan mo an mga daing sukat.

¹¹ Itinao nin Kagurangnan an pagboot; dinara kan kadaklan an bareta:

¹² “Nagdurulag an mga hade asin an saindang mga hukbo!” Sa harong binaranga kan mga babae an mga sinamsam:

¹³ mga ladawan nin salampati na patos nin plata, na an mga pakpak nagsisilyab huli ta patos nin purong bulawan. (Tadaw ta an iba saindo nagpawalat sa kulungan nin karnero sa aldaw nin gera?)

¹⁴ Kan an mga hade iwararak kan Makakamhan na Dios sa Bukid nin Zalmon, yelo an pinahugpa niya duman.

¹⁵ Dakulang bukid an bukid nin Basan, bukid nin dakul na alitoktok, an bukid nin Basan!

¹⁶ O bukid nin dakul na alitoktok, tadaw ta naaara ka sa bulod na minawot nin Dios na magin niyang erokan? Duman maerok an Kagurangnan sagkod lamang!

¹⁷ Kaiba an ribo-ribong matitibay niyang karwahe, nag-abot sa banal na lugar an Kagurangnan hale sa Sinai.

¹⁸ Tinutukad niya an halangkaw na bukid, dara an dakul na bihag; minaako siya nin mga regalo maski an mga gikan sa masombikal na tawo. Duman maerok an Kagurangnan Dios.

¹⁹ Pag-omawon an Kagurangnan, na minadara aroaldaw kan satong mga pasan; siya an Dios nin satong kaligtasan.

²⁰ An satong Dios sarong Dios nin kaligtasan; siya an Kagurangnan, an satong Kagurangnan, na minaligtas sato sa kagadanan.

²¹ Papasaon nanggad nin Dios an mga payo nin saiyang mga kaiwal, nin mga nagdadanay sa saindang kasalan.

²² Nagtaram an Kagurangnan, “Ibabalik ko sinda hale sa Basan, ibabalik ko sinda hale sa mga kairaroman nin dagat,

²³ tanganing mahanawan nindo an saindong mga bitis sa dugo, asin an mga dila nin saindong mga ayam makanamit kan saindang kahirasan sa kaiwal.”

²⁴ O Dios, nahihiling an saimong mga solemneng prosesyon, an mga prosesyon nin sakong Dios, sakong hade, pasiring sa santwaryo.

²⁵ An mga paraawit nasa enotan, an mga musiko nasa hudyan, an mga babaeng nagtutugtog nin tamborin nasa pagultanan.

²⁶ “Pag-omawon an Dios sa katiriponan nin saiyang banwaan; kamong kapagarakian ni Jacob, omawon nindo an Kagurangnan!”

²⁷ Sa enotan si Benjamin, an pinakasadit sa tribu, dangan an mga lider ni Juda saka an saindang pag-iriba, kasunod an mga lider ni Zabulon saka ni Neftali.

²⁸ O Dios, ipahiling mo an saimong kapangyarihan, an kapangyarihan na ginamit mo sa pagligtas samo.

²⁹ Huli kan saimong Templo sa Jerusalem, an mga hade nagdadara saimo nin mga regalo.

³⁰ Tuyawa an Egipto, an maringis na hayop na nag-eerok sa kabariwan; tuyawa an mga nasyon, an mga torong baka asin an saindang mga ogbon, sagkod na sinda magluhod asin magdolot saimo kan saindang mga plata. Iwarak mo an mga tawong namomoot sa pakigera.

³¹ Maabot an mga sugo hale sa Egipto; mga kamot iitaas kan mga taga Etiopia sa pagpamibi sa Dios.

³² Mga kahadean sa daga, mag-awit kamo sa Dios, mag-awit nin pag-omaw sa Kagurangnan,

³³ sa saiya na naglulunad sa kalangitan, mga suanoy na kalangitan. Uya, ipinapadara niya an saiyang tingog, an makosog niyang tingog.

³⁴ Irukyaw nindo an kapangyarihan nin Dios, na an kamurawayan nasa Israel, na an kapangyarihan nasa kalangitan.

³⁵ Kinatatakotan an Dios sa saiyang santwaryo, an Dios nin Israel; siya minatao nin kapangyarihan asin kosog sa saiyang banwaan. Pag-omawon an Dios!