Salmo 67 - Marahay na Bareta Biblia

Sarong Awit nin Pasalamat

¹ O Dios, kaheraki asin bendisyoni kami; paliwanaga sa samo an saimong lalawogon,

² tanganing maaraman kan bilog na daga an saimong kabotan; tanganing an gabos na nasyon makaaram kan saimong kaligtasan.

³ Pag-omawon ka logod kan gabos na tawo, O Dios; pag-omawon ka logod kan gabos na tawo!

⁴ Mag-ogma logod an gabos na nasyon asin mag-awit sa kaogmahan, huli ta matanos na hinuhukoman mo an mga banwaan asin an lambang nasyon sa daga saimong pinapangenotan.

⁵ Pag-omawon ka logod kan gabos na tawo, O Dios; pag-omawon ka logod kan gabos na tawo!

⁶ Itinao kan daga an saiyang bunga; an Dios, an satuyang Dios, an nagbendisyon sato.

⁷ Benendisyonan kita nin Dios; matakot logod saiya an gabos na tawo sa kinaban.