Salmo 66 - Marahay na Bareta Biblia

Sarong Awit nin Pag-omaw asin Pasalamat

¹ Omawon nindo an Dios sa kinurahaw nin kaogmahan, kamo gabos na banwaan!

² Mag-awit kamo sa kamurawayan nin saiyang ngaran; tawan siya nin mamurawayon na pag-omaw!

³ Sabihan nindo an Dios, “Makangangalas an saimong ginibohan! Dakula nin marahay an saimong kapangyarihan, kaya an saimong mga kaiwal minaduko sa takot sa saimong atubang.

⁴ An bilog na daga nagsasamba saimo; nag-aawit saimo nin mga pag-omaw, nag-aawit nin mga pag-omaw sa saimong ngaran.”

⁵ Madya asin hilinga an ginibo nin Dios, an makangangalas niyang mga gibo sa tahaw nin katawohan.

⁶ Ginibo niyang mamarang daga an dagat; naglalakaw na inibong an salog kan sakong mga ginikanan. Nag-ogma kita duman huli kan ginibo niya.

⁷ Naghahade siya huli kan saiyang kosog sagkod lamang asin an gabos na nasyon saiyang binabantayan— dai magpaabaw-abaw an mga masombikal.

⁸ Mag-omaw kamo sa samong Dios, gabos na nasyon; madangog logod an tingog kan saindong pag-omaw,

⁹ sa saiya na padagos satong nagbubuhay asin dai nagtutugot na kita magadan.

¹⁰ Kami saimong binabalo, O Dios; siring na sa kalayo an plata binabalo, siring man an ginigibo mo samo.

¹¹ Itinugot mong mahulog kami sa siod asin pinapasan mo kami nin magabat.

¹² Pinatimaktimakan mo kami sa samong mga kaiwal; nag-agi kami sa kalayo asin baha, alagad ngunyan dinara mo kami sa sarong kahiwasan.

¹³ Sa saimong harong madara ako nin mga tinutong na atang; mga panuga ko saimo sakong ootobon.

¹⁴ Itatao ko saimo an ipinanuga ko kan ako nasa kasakitan.

¹⁵ Madolot ako saimo nin karnerong tututongon sa altar; masakripisyo ako nin mga torilyong baka saka kanding, asin an aso kaini maitaas sa kalangitan.

¹⁶ Madya asin pagdangog, kamo gabos na may pagkatakot sa Dios, asin sasabihan ko kamo kan ginibo niya sako.

¹⁷ Makosog akong nag-agrangay sa saiya, asin inomaw siya kan sakong dila.

¹⁸ Kun rinimpos ko sana sa puso an sakong mga kasalan, dai kutana ako dinangog nin Kagurangnan.

¹⁹ Alagad totoong an Dios naghinanyog, pamibi ko saiyang dinangog.

²⁰ Pag-omawon an Dios, huli ta dai niya isinikwal an sakong pagngayo-ngayo o hinale an danay niyang pagkamoot sako.