Salmo 64 - Marahay na Bareta Biblia

Pamibi Tanganing Ingatan

¹ Dangoga an tingog ko, O Dios, sa sakuyang pag-agrangay; takot ako sa mga kaiwal—ligtasan an sakong buhay.

² Ingati ako sa mga hilom na kaisipan kan mga tampalasan, sa mga kamawotan kan paragibo nin karatan.

³ Tinatais ninda siring sa espada an saindang mga dila; an saindang mga tataramon garong mga bosog na pinapatama.

⁴ Patago na pinapana ninda an mga mayong sala, bigla asin mayong takot na minapana.

⁵ Nagsisinadolan sinda dapit sa mga maraot na gigibohon; pinag-oolayan an pagbugtak nin mga siod na hilom. Olay ninda, “Siisay an makakahiling sato?

⁶ Siisay an makakaaram kan mga maraot tang gibo? Areglado nanggad an satong mga plano.” Hararom an puso saka isip nin tawo!

⁷ Alagad papanaon sinda nin Dios, asin malulugadan sinda tolos.

⁸ Huli kan saindang dila, raraoton niya sinda; dangan makuyong-kuyong nin payo an gabos na nakakahiling sainda.

⁹ Magkakatarakot an gabos na tawo; maghohorophorop kan mga ginibo nin Dios, asin ipapamareta iyan gabos.

¹⁰ An mga matanos mag-oogma sa Kagurangnan, asin sa saiya makakakua nin pailihan. An mga matanos an puso magmumuraway.