Salmo 61 - Marahay na Bareta Biblia

Pamibi Tanganing Ingatan

¹ O Dios, an sakong inagrangay dangoga, an sakong pamibi himatea.

² Ako minaapod saimo hale sa poro kan daga, kan an sakong puso pinanluluya. Sa sarong ligtas na lugar daraha ako,

³ huli ta ika an pailihan ko, sarong pusog na bantayan tumang sa mga kaiwal ko.

⁴ Sagkod pa man tugotan mo akong mag-erok sa saimong santwaryo, ligtas sa lindong kan mga pakpak mo.

⁵ O Dios, an sakuyang mga panuga nadangog mo; itinao mo sako an pamana kan mga may pagkatakot saimo.

⁶ Itao mo sa hade an halawig na buhay, tugoteng mabuhay siya sa dakul na henerasyon.

⁷ O Dios, maghade logod siya sagkod pa man sa saimong atubang; logod siya bantayan kan danay mong pagkamoot asin pagkamaimbod.

⁸ Kaya danay akong mag-aawit sa saimong ngaran, mantang inootob ko aroaldaw an sakong panuga.