Salmo 58 - Marahay na Bareta Biblia

Pamibi sa Dios Tanganing Padusahan an mga Tampalasan

¹ Matanos daw an saindong mga pagboot, kamong mga dios-dios? Matanos daw an hatol na itinatao nindo sa katawohan?

² Bako! Mga karatan an mukna kan saindong mga puso; dahas an gibo sa daga kan saindong mga kamot.

³ Poon na ipangidam, an mga tampalasan naglalagalag na; putikon na sinda poon pagkamundag.

⁴ May kamandag sinda arog kan sa halas, sineserahan an saindang talinga arog kan bongog na kobra,

⁵ tanganing dai madangog an tingog kan paragayuma o kan tusong salamangkero.

⁶ O Dios, ronota an mga ngipon kaining mariringis na leon; Kagurangnan, gabota an saindang mga tingo.

⁷ Mapara logod sinda siring sa minabulos na tubig; siring sa doot, timaktimakan logod sinda asin maalang.

⁸ Makaarog logod sinda sa guling-guling na nagigin laboy; siring sa aking gadan nang namundag, ta sala sa panahon asin dai lamang nakahiling nin liwanag.

⁹ Siring sa doot, berde man o alang, sighidon logod sinda nin Dios, bago magkaigwa nin tonok.

¹⁰ An matanos mag-oogma kun mahiling niya an pagpadusa sa makasalan; mahanaw siya kan saiyang mga bitis sa dugo kan tampalasan.

¹¹ Masabi an mga tawo, “Totoong an mga matanos binabalosan; totoong may Dios na naghuhukom sa kinaban.”