Salmo 53 - Marahay na Bareta Biblia

An Karungawan nin mga Tawo

¹ An mga lolong minasabi sa saindang puso, “Mayo nin Dios.” Gabos sinda marompot, naggigibo nin maraot; mayo nang minagibo nin matanos.

² Hale sa langit minadungaw an Dios sa paghiling sa mga aki nin tawo, kun igwa sainda nin mga madonong, nin mga naghahanap sa Dios.

³ Alagad gabos sinda nagtalikod, gabos nagin marompot; mayo nin naggibong matanos, mayo maski saro.

⁴ Dai daw nakakasabot an mga tampalasan, na garo tinapay na kinakakan an sakuyang banwaan, asin dai nag-aapod sako?

⁵ Alagad aabotan sinda nin dakulang takot, na kaidto dai pa lamang nangyari; huli ta iwawarak nin Dios an mga tolang kan mga kaiwal nin saiyang banwaan. Magkakasoropog sinda huli ta isinikwal sinda nin Kagurangnan.

⁶ Gumikan logod sa Sion an kaligtasan nin Israel! Kun ibalik na nin Dios an kayamanan nin saiyang banwaan, mag-oogma si Jacob, mag-oogma si Israel.