Salmo 51 - Marahay na Bareta Biblia

Pamibi sa Paghagad nin Tawad

¹ Kaheraki ako, O Dios, sosog sa danay mong pagkamoot. Sosog sa dakula mong pagkaherak, paraa an sakong mga kasalan!

² Hugasi ako kan gabos kong karatan; linigi ako kan sakong mga kasalan!

³ Huli ta nasasabotan ko an sakuyang mga kasombikalan; danay na nasa atubang ko an sakong kasalan.

⁴ Tumang saimo, sa saimo sana, nagkasala ako. Ginibo ko an maraot sa atubang mo. Kaya matanos ka sa paghukom sako; dai nasasala sa pagpadusa sako.

⁵ Uya, namundag ako sa kasombikalan; ipinangidam ako kan sakong ina sa kasalan.

⁶ Mawot mo an katotoohan sa lambang linalang, kaya panoa ako nin kadonongan.

⁷ Halea an kasalan ko asin ako malilinigan; hugasi ako, asin magigin maputi ako siring sa ambon.

⁸ Panoa ako nin kaogmahan asin kagayagayahan; gibohang magin maogma an rinonot mong mga tolang.

⁹ Hare paghilinga an sakong mga kasalan; paraa an sakong mga kasombikalan.

¹⁰ Pusong malinig lalanga sako, O Dios, sarong bago asin maimbod na espiritu ibugtak mo sako.

¹¹ Hare ako pagsikwalan sa atubangan mo; hare paghalea sako an banal mong Espiritu.

¹² Ibalik mo sako an kaogmahan nin saimong kaligtasan, asin giboha akong makinuyog-kuyog saimo.

¹³ Dangan itutukdo ko sa mga parakasala an saimong mga dalan, asin mabalik saimo an mga makasalan.

¹⁴ Ligtasan ako, O Dios, sa kagadanan, ika na Dios nin sakuyang kaligtasan, asin an sakong dila mag-aawit kan saimong katanosan.

¹⁵ Kagurangnan, bukahon mo an sakuyang ngoso, asin an sakong dila magrurukyaw kan saimong kaomawan.

¹⁶ Dai mo minamawot an mga sakripisyo; maski magdolot ako nin tinutong na atang, dai mo man mawiwilihan.

¹⁷ O Dios, espiritung nagsosolsol an sakong atang; mapakumbaba asin nagsosolsol na puso dai mo isisikwal.

¹⁸ Sa saimong pagkamarahayon, tabangan mo an Sion; an mga lanob nin Jerusalem saimong pakarahayon.

¹⁹ Dangan ikakaogma mo an mga maninigong sakripisyo, asin an samong mga tinutong na atang; mga torong baka na idodolot sa saimong altar.