Salmo 49 - Marahay na Bareta Biblia

An Kalolongan kan Pagsarig sa Kayamanan

¹ Dangoga nindo ini, kamo gabos na banwaan! Himatea nindo, gabos na tawo sa kinaban,

² dakula asin sadit, dukha saka mayaman!

³ An ngoso ko magtataram nin kadonongan; an puso ko maghohorophorop nin pakasabot.

⁴ Dadangogon ko an mga talinhaga asin ipapahayag an saindang kahulogan mantang nagtutugtog ako sa lira.

⁵ Tadaw ta matatakot ako sa panahon nin kasakitan, kun napapalibotan ako kan sakong mga kaiwal,

⁶ mga tawong nagsasarig sa saindang kayamanan, na naghahambog huli sa kadakulan kaiyan?

⁷ Sa katotoohan mayong makakabalukat kan saiyang sadiri; dai niya mababayadan an Dios kan halaga kan saiyang buhay,

⁸ huli ta an kabayadan kan buhay nin tawo dakulang gayo, asin an ibabayad niya dai nanggad magkakanigo,

⁹ tanganing padagos siyang mabuhay sagkod lamang, asin makaligtas sa lulubngan.

¹⁰ Mahihiling niya na maski an madonong na tawo nagagadan, siring man an mga lolong asin mga mangmang. Iwawalat ninda an saindang kayamanan sa saindang kapagarakian.

¹¹ An mga lulubngan iyo an saindang mga harong sagkod lamang; duman sinda mag-eerok sagkod pa man, maski ngani dakul na daga an nasa saindang ngaran.

¹² An tawo dai pwedeng maglaom sa saiyang kayamanan; arog kan mga hayop, siya magagadan man.

¹³ Ini an aabotan kan mga nagsasarig sa sadiri, an kataposan kan mga nawiwili sa saindang kayamanan.

¹⁴ Arog kan mga karnero, magagadan man sinda; an Kagadanan iyo an saindang magigin pastor. Dadaogon sinda kan mga matanos, mantang an saindang mga hawak naglalapa sa lugar nin mga gadan, harayo sa saindang mga harong!

¹⁵ Alagad ililigtas nin Dios an sakong kalag; ililigtas niya sa kapangyarihan nin kagadanan.

¹⁶ Dai matakot kun magin mayaman an sarong tawo, kun magdakul man an saiyang kayamanan.

¹⁷ Dai man niya iyan madadara kun siya magadan; dai man maiba saiya sa lulubngan an saiyang kayamanan.

¹⁸ Maski ibinibilang nin tawo na maogma siya mantang nabubuhay, asin maski siya inoomaw huli ta nagin mauswag,

¹⁹ maduman man siya sa lugar kan saiyang mga ginikanan, na dai na makakahiling nin liwanag sagkod pa man.

²⁰ An tawo dai pwedeng maglaom sa saiyang kadakulaan; arog kan mga hayop, siya magagadan man.