Salmo 48 - Marahay na Bareta Biblia

Sion, an Syudad nin Dios

¹ Dakula an Kagurangnan asin maninigong pag-omawon sa syudad nin satong Dios, sa banal niyang bulod.

² An Sion, an bukid nin Dios, halangkaw asin magayon; an Sion, syudad kan dakulang hade, iyo an kaogmahan kan bilog na daga.

³ An Dios nagpapahiling na sa laog kan mga bantayan siya an pailihan.

⁴ Nagtiripon an mga hade asin nag-arabot sa pagsalakay kan Bukid nin Sion.

⁵ Alagad kan mahiling ini, sinda nagngaralas; nagkatarakot sinda asin nagdurulag.

⁶ Duman inabtan sinda nin takig, nin kulog siring sa babaeng nangangaki;

⁷ siring sa mga sakayan nin Tarsis na rinoronot nin makosog na bagyo.

⁸ Siring sa samong nadangog, siring man an samong nahiling sa syudad nin Kagurangnan nin mga hukbo, sa syudad nin satong Dios, syudad na papatindogon nin Dios sagkod pa man.

⁹ O Dios, an danay mong pagkamoot hinohorophorop mi sa laog kan saimong Templo.

¹⁰ Inoomaw ka kan mga tawo saen man, nakakalakop sa bilog na daga an saimong ngaran. Naghahade ka na may katanosan;

¹¹ mag-ogma an mga taga Sion! Mag-ogma an mga aking babae nin Juda, huli kan mga matanos mong paghukom!

¹² Banwaan nin Dios, lakaw sa palibot nin Sion asin bilanga an mga tore;

¹³ hilinga nin marahay an mga kudal asin siyasata an mga bantayan, tanganing ikaosip mo sa masunod na henerasyon:

¹⁴ “An Dios na ini iyo an satuyang Dios sagkod pa man; mangengenot siya sato sa gabos na panahon.”