Salmo 47 - Marahay na Bareta Biblia

An Pinakahalangkaw na Hade

¹ Gabos na banwaan, magparakpak kamo sa kaogmahan! Ikurahaw nindo sa Dios mga awit nin kaogmahan!

² Huli ta an Kagurangnan, an Kahorohalangkawe, kinatatakotan, dakulang hade sa bilog na kinaban.

³ Ipinapasakop niya sato an mga banwaan, an mga nasyon ibinubugtak niya sa satong pamitisan.

⁴ An satong pamana pinili niya para sato, an orgulyo ni Jacob na saiyang namomotan.

⁵ An Dios suminakat kaiba an kinurahaw, an Kagurangnan kaiba an tanog nin trompeta.

⁶ Mag-awit kamo nin mga pag-omaw sa Dios! Mag-awit kamo nin mga pag-omaw sa satong hade!

⁷ An Dios hade kan bilog na kinaban; omawon siya sa paagi nin mga salmo!

⁸ An Dios nagtutukaw sa saiyang banal na trono; siya naghahade sa mga nasyon.

⁹ Nagtitiripon an mga prinsipe nin mga banwaan, siring man an banwaan kan Dios ni Abraham. Siya orog na mapangyari ki sa gabos na hukbo; pinakahalangkaw siya sa mga naghahade.