Salmo 45 - Marahay na Bareta Biblia

Awit sa Kasal nin Hade

¹ Pano nin magagayon na tataramon, an sakong isip, mantang ginigibo ko an awit na ini para sa hade. Siring sa pluma nin sarong marahay na parasurat, an sakong dila andam sa pagsabi nin sarong tula.

² Ika an pinakagwapo sa mga kalalakihan; ika sarong marahay na parataram; kaya benebendisyonan ka nin Dios sagkod lamang.

³ Ihagkos mo an saimong espada, O mapangyaring hade; mamuraway ka asin mapangyari.

⁴ Sa saimong kamurawayan lumuwas kang mapanggana sa pagsurog sa katotoohan asin sa katanosan! Mga dakulang panggana makakamtan mo huli kan saimong kosog!

⁵ Mapapanas an saimong mga bosog sa puso kan saimong mga kaiwal minatama; an mga nasyon nagkakaturumba sa saimong pamitisan.

⁶ An banal mong trono magdadanay sagkod lamang. Setro nin katanosan an setro nin saimong kahadean;

⁷ namomoot ka sa katanosan asin naoongis sa karatan. Kaya linahidan ka nin Dios, na saimong Dios, kan lana nin kaogmahan orog ki sa ibang mga hade.

⁸ An saimong mga gubing namamarong nin mira, aloe asin kasia; rinaranga ka kan mga musiko sa mga palasyong marpil.

⁹ Mga aking daraga nin mga hade kabilang sa mga ginagalangan na babae sa saimong palasyo; nakatindog sa too mo an reyna, pinakamarahay na bulawan an sulot niya.

¹⁰ Nobya kan hade, hinanyoga an sakong sasabihon— lingawan mo an saimong banwaan asin an saimong mga kadugo.

¹¹ Mamawoton kan hade an saimong kagayonan; siya an saimong kagurangnan, kaya kuyogon mo siya.

¹² Mga taga Tiro madara saimo nin mga regalo; mga tawong mayaman magmamawot na mawilihan mo.

¹³ Nasa palasyo an prinsesa—anong gayon niya! Ginibo hale sa torsidong bulawan an gubing niya.

¹⁴ Sulot an gubing na manlaen-laen an kolor, an prinsesa inaatubang sa hade, kaiba an mga abay na daraga na nagsusunod saiya.

¹⁵ Maogma sinda asin magayagaya, mantang dinadara asin ilinalaog sa palasyo kan hade.

¹⁶ Sakong hade, magkakaigwa ka nin dakul na aking lalaki, na masalihid bilang mga hade sa mga ginikanan mo, asin gigibohon mo sindang mga pamayo sa bilog na daga.

¹⁷ Bubuhayon kan sakong awit an saimong dangog sagkod pa man; oomawon ka nin mga banwaan sa panahon na daing kasagkoran.