Salmo 44 - Marahay na Bareta Biblia

Panambitan kan Banwaan nin Dios

¹ O Dios, nadangog mi kan samong mga talinga— sinabi samo kan samong mga ginikanan, an mga ginibo mo kan panahon ninda, kan mga aldaw na haloy nang nakaagi:

² kun paano mo pinahale an mga nasyon, asin pinatindog sa daga ninda an saimong banwaan; an ibang mga nasyon saimong pinadusahan, alagad an sadiri mo tinawan nin katalingkasan.

³ Bakong huli sa saindang espada napasainda an daga; bakong huli sa saindang kosog nakamtan an panggana; kundi huli sa too mong kamot asin takyag patin sa liwanag kan lalawogon mo; huli ta sinda nawilihan mo.

⁴ Ika an sakuyang hade asin sakuyang Dios; ika an nagtatao nin kapangganahan ki Jacob.

⁵ Huli saimo nadadaog mi an mga kaiwal, natitimaktimakan mi sinda huli kan saimong ngaran.

⁶ Dai ako minasarig sa sakuyang pana, o sa sakuyang espada tanganing makaligtas.

⁷ Alagad ilinigtas mo kami sa samong mga kaiwal; linibong mo an igwa nin kaanggotan samo.

⁸ Danay kaming mag-oomaw sa Dios, asin magpapasalamat saiya sagkod lamang.

⁹ Alagad ngunyan, kami isinikwal mo asin pinabayaan na madaog; an samong mga hukbo dai mo na iniibahan.

¹⁰ Pinadulag mo kami sa samong mga kaiwal; an mga sadiri mi saindang sinamsam.

¹¹ Siring sa mga karnero, tinugotan mo kaming bunoon; iwinarak mo kami sa ibang mga nasyon.

¹² Baratong ipinabakal mo an sadiri mong banwaan, na garo mayo nin halaga asin pakinabang.

¹³ Ginibo mo kaming ngingisihan kan mga kataraed nyamo; tinuyatuya, pinag-olog-olog kan mga nakapalibot samo.

¹⁴ Itinugot mong pagbansagan kami kan mga nasyon, ginibong ngingisihan sa tahaw nin katawohan.

¹⁵ Bilog na maghapon disonra an kaatubang ko, asin sopog an nakatahob sa lalawogon ko,

¹⁶ mantang nadadangog ko an mga paraolog-olog asin paratuya-tuya; mantang nahihiling ko an sakong mga kaiwal asin an mga anggot sakuya.

¹⁷ Nangyari ini samo, maski dai mi ika liningawan, maski dai mi linapas an saimong tipan.

¹⁸ Dai man nagtalikod saimo an samong puso; dai man kami naglihis sa saimong dalan.

¹⁹ Alagad rinonot mo kami sa tahaw nin mga lalaw na ayam, asin tinahoban kami kan mahibog na kadikloman.

²⁰ Kun nalingawan mi an saimong ngaran asin nagsamba sa ibang mga dios-dios,

²¹ dai mo daw iyan maisihan, huli ta aram mo an mga hilom nin puso?

²² Alagad huli saimo kami ginagadan sa bilog na aldaw, inaarog sa mga karnerong bubunoon.

²³ Magbangon ka! Tadaw ta nagkakatorog ka, Kagurangnan? Magbangon ka! Hare kami pagsikwalan sagkod lamang.

²⁴ Tadaw ta tinatago mo an saimong lalawogon? Tadaw ta linilingawan mo an samong kasakitan asin kaapihan?

²⁵ An samong kalag natutumba sa alpog; an samong hawak nahuhutad sa daga.

²⁶ Magbangon ka, madya sa pagtabang samo! Ligtasan kami huli kan danay mong pagkamoot.