Salmo 4 - Marahay na Bareta Biblia

Pamibi sa Pagkabanggi

¹ Simbaga ako kun ako mag-apod, O Dios, sakuyang katanosan! Tinabangan mo ako kan ako nasa kasakitan. Kaheraki ako ngunyan asin dangoga an sakong pamibi.

² Sagkod nuarin nindo ako sosopogon, O mga tawo? Sagkod nuarin nindo mamomotan an mayong halaga, asin hahanapon an kaputikan?

³ Giromdoma na pinili nin Kagurangnan para saiya an mga banal; dinadangog ako nin Kagurangnan kun siya sakong inaapodan.

⁴ Matakot kamo saiya asin dai magkasala; sa katoninongan maghorophorop kamo sa saindong mga higdaan.

⁵ Magdolot nin maninigong mga atang, asin magsarig kamo sa Kagurangnan.

⁶ Dakul an nagsasabi, “Makahiling logod kami nin mga karahayan! Hilinga kami na may pagkaherak, O Kagurangnan!”

⁷ Itinao mo sakuya an dakulang kaogmahan labi pa kan ogma na saindang namatean kan dakul na arak saka trigo an saindang nakamtan.

⁸ Sa katoninongan ako mahigda dangan matorog; huli ta ika sana, O Kagurangnan, an minapaerok sako sa katiwasayan.