Salmo 36 - Marahay na Bareta Biblia

An Karatan nin Tawo

¹ An kasalan nagtataram sa tawong maraot sa kairaroman nin saiyang puso; mayo nin pagkatakot sa Dios sa saiyang mga mata.

² Huli ta inoomaw niya an saiyang sadiri; naghohona na dai maaaraman nin Dios an saiyang kasalan asin dai kaoongisan.

³ An saiyang ngoso pano nin karatan asin kaputikan; mayo na siyang gibong tama asin marahay.

⁴ Minamukna siya nin maraot sa saiyang higdaan; mayo na saiya maski anong karahayan, dai siya minasayuma sa anoman na karatan.

An Pagkamarahayon nin Dios

⁵ Kagurangnan, an danay mong pagkamoot nakakaabot sa kalangitan; an saimong pagkamaimbod nakakaabot sa kapanganoronan.

⁶ Arog sa kabukidan nin Dios an saimong katanosan; an saimong mga paghukom arog sa dakulang kairaroman. Tawo asin hayop saimong inaataman.

⁷ Mahalaga, O Dios, an danay mong pagkamoot! An mga aki nin tawo minapaili sa lindong kan saimong mga pakpak.

⁸ Nagpipyesta sinda sa dakul na pagkakan sa saimong harong; pinapainom mo sinda sa salog nin saimong pagkamarahayon.

⁹ Huli ta yaon saimo an burabod nin buhay, asin sa liwanag mo kami nakakahiling nin kaliwanagan.

¹⁰ Padagos mong kamotan an mga nakakamidbid saimo, asin ligtasan an mga matanos an puso.

¹¹ Hare pagtugot na salakayon ako kan mapaabaw-abaw, o mapadulag ako kan mga tampalasan.

¹² Hilinga an kamugtakan kan mga tampalasan; nagkapurukan sinda, dai nakakabangon man lamang.