Salmo 35 - Marahay na Bareta Biblia

Sarong Pamibi sa Paghagad nin Tabang

¹ Iwalon mo Kagurangnan, an mga nakikiiwal sako; labanan mo an mga nakikilaban sako.

² An saimong kalasag asin armas kuahon mo, asin madya, tabangan mo ako.

³ Andama an saimong garod saka patok, tumang sa mga naglalamag sako. An kalag ko saimong taraman, “Ako an saimong kaligtasan!”

⁴ Mapano logod nin sopog asin disonra an mga nagmamawot kan sakong kagadanan! Magsiribog logod asin magkarilibong an mga nagpaplano sako nin karatan!

⁵ Magin arog logod sinda sa ata na ipinapadpad kan doros, mantang linalamag sinda kan anghel nin Kagurangnan!

⁶ Magin madiklom saka mahalnas logod an saindang agihan, mantang pinapadusahan sinda kan anghel nin Kagurangnan!

⁷ Mayong dahelan na nagbugtak sinda nin siod para sako; mayong dahelan na nagkalot sinda sa pagdakop sako.

⁸ Bigla logod na dumatong sainda an karatan, madakop sa siod na saindang tinahoban, mahulog sa kalot na saindang inandam.

⁹ Dangan mag-oogma ako sa Kagurangnan, mag-oogma sa saiyang kaligtasan.

¹⁰ Masarabi an sakong mga tolang, “Siisay an makakaarog saimo, Kagurangnan? Iliniligtas mo an mga maluya, sa mga mas makosog sainda; an mga dukha, sa nang-aapi sainda.”

¹¹ Putikon na mga saksi an minaatubang, sa paghapot kan mga dai ko naaaraman.

¹² Karatan an balos ninda sa karahayan; an sakuyang kalag nawawaran nin paglaom.

¹³ Alagad kan sinda naghelang, ako nagmondo; nagsakripisyo ako huli sa pag-ayuno; namibi na duko an sakuyang payo,

¹⁴ na garo namimibi para sa tugang o katood; naglilibot na nagmomondo, na garo para sa ina ko.

¹⁵ Alagad kan ako madapa, sinda nag-orogma, sa pag-olog-olog sako nagtiripon sinda. Mga dayuhan naghampak sako, daing ontok na nagpakaraot sako.

¹⁶ Padagos na tinuya-tuya ninda ako; mga ngipon pinaparagot ninda tumang sako.

¹⁷ Sagkod nuarin ka magmamasid sana, Kagurangnan? Ligtasan ako sa saindang mga pagsalakay; sa mga leon na ini, ligtasan an sakong buhay!

¹⁸ Dangan magpapasalamat ako saimo sa dakulang katiriponan; mag-oomaw ako saimo sa saindang atubang.

¹⁹ Hare pagtugot na ako pagngisihan kan sakong mga putikon na kaiwal. Hare pagtugot na magkiriyat-kiyatan an mga anggot sako na mayong dahelan.

²⁰ Habo sinda kan katoninongan; ata ngani nag-iisip nin pagdaya sa mga matoninong sa daga.

²¹ Buka an ngoso, minapahayag sinda tumang sako, “Totoo! Totoo! Nahiling mi na ika an naggibo.”

²² Alagad, Kagurangnan, nahiling mo; dai ka mag-alo! Kagurangnan, dai ka magharayo sako!

²³ Magmata ka, Kagurangnan, sa pagsurog sako; bumangon ka, sakuyang Dios, sa pagtabang sako.

²⁴ O Dios, matanos na Kagurangnan, ipahayag mo an sakong katanosan; hare pagtugot na ako pagngisihan kan sakong mga kaiwal.

²⁵ Hare pagtugot na sinda magsaboot, “Naotob na an samong minamawot!” Hare pagtugot na sinda magsabi, “Nawara na siya sa atubangan mi!”

²⁶ Magkasoropog logod asin magkarilibong an mga nag-oogma sa sakong kasakitan. Mapano logod nin sopog asin disonra an mga mapaabaw-abaw sa sakong atubang.

²⁷ Tugotan mong magkurahaw sa kaogmahan an mga nagmamawot kan sakong kaligtasan, asin nagpapahayag sagkod pa man, “Dakula an Kagurangnan, na nawiwili sa kauswagan kan saiyang oripon!”

²⁸ Dangan ipapahayag ko an saimong katanosan asin kaomawan sa bilog na aldaw.