Salmo 32 - Marahay na Bareta Biblia

Pagkumpisal asin Kapatawadan

¹ Paladan an tawong pinatawad na an mga kasalan, an tawong napara na an kalapasan.

² Paladan an tawong dai sinasala nin Kagurangnan, an tawong mayo nin daya.

³ Kan dai ko ikinumpisal an sakong mga kasalan, napagal ako nin marahay, huli sa bilog na aldaw kong pag-agrangay.

⁴ Aldaw-banggi mo akong pinadusahan, Kagurangnan; an sakong kosog naalang siring sa ambon na pinamara kan init nin aldaw.

⁵ Dangan nagkumpisal ako kan sakong kasalan saimo; dai ko tinago an mga sala kong gibo. Nagsabi ako, “Ikukumpisal ko an sakong mga kasalan sa Kagurangnan,” asin pinatawad mo an gabos kong kalapasan.

⁶ Kaya kaipuhan mamibi saimo an gabos na tawong maimbod saimo sa panahon nin pangangaipo; kun mag-abot an sarong dakulang baha nin kasakitan, dai iyan makakaabot sainda.

⁷ Ika an sakong lugar na tagoan; iliniligtas mo ako sa kasakitan. Makosog akong nag-aawit kan saimong kaligtasan, huli ta ako saimong iniingatan.

⁸ Nagtaram an Kagurangnan, “Itutukdo ko saimo an dalan na saimong lalakawan; babantayan taka asin huhulitan.

⁹ Dai mo pag-arogon an sarong kabayo o sarong mula, na mayo nin pakasabot, na kaipuhan bugtakan nin busal saka renda tanganing magsunod.”

¹⁰ Kadakul an titioson kan mga maraot, alagad an danay na pagkamoot nakapalibot sa mga tawong nagsasarig sa Kagurangnan.

¹¹ Mag-ogma kamo sa Kagurangnan maggayagaya kamong mga matanos. Magkurahaw kamo sa kaogmahan, kamong mga nagkukuyog saiya!