Salmo 30 - Marahay na Bareta Biblia

Sarong Pamibi nin Pasalamat

¹ Oomawon taka, Kagurangnan, huli ta ilinigtas mo ako asin dai mo itinugot na pagngisihan ako kan sakong mga kaiwal.

² Nag-agrangay ako saimo, Kagurangnan na sakong Dios, asin binolong mo ako;

³ dai mo ako itinugot na magadan; binuhay mo ako liwat hale sa daga nin mga gadan.

⁴ Mag-awit nin mga pag-omaw sa Kagurangnan, kamo gabos na banal, asin magpasalamat kamo sa banal niyang ngaran.

⁵ Minaagi sana an saiyang kaanggotan, alagad an saiyang karahayan sagkod lamang. Pwedeng magbulos an luha sa pagkabanggi, alagad an kaogmahan minadatong sa pagkaaga.

⁶ Sa sakong kauswagan, nagsaboot ako, “Dai nanggad ako matatanyog.”

⁷ Sa pagkamarahayon mo, Kagurangnan; pinatindog mo ako siring sa sarong makosog na bukid. Alagad tinagoan mo ako; asin natakot ako.

⁸ Nag-apod ako saimo, Kagurangnan; naghagad ako kan saimong tabang:

⁹ “Anong pakinabang mo kun ako magadan, kun ako maghilig sa lulubngan? Oomawon ka daw kan alpog? Ikakabalangibog daw kaini an saimong pagkamaimbod?

¹⁰ Dangoga ako, Kagurangnan, asin maherak ka sako! Kagurangnan, tabangan mo ako!”

¹¹ An sakong kamondoan sinanglean mo nin pagsayaw; hinale mo an sakong pagmondo asin hinagkosan mo ako nin kaogmahan.

¹² Kaya dai ako maontok; mag-aawit ako nin pag-omaw saimo. Kagurangnan kong Dios, magpapasalamat ako saimo sagkod pa man.