Salmo 29 - Marahay na Bareta Biblia

An Tingog nin Kagurangnan sa Tahaw nin Bagyo

¹ Mga langitnon na linalang, itao nindo sa Kagurangnan; kamurawayan asin kapangyarihan itao sa Kagurangnan.

² Itao sa Kagurangnan an kamurawayan nin saiyang ngaran; sambahon an Kagurangnan sa saiyang pagdatong.

³ An tingog nin Kagurangnan nasa ibabaw nin katubigan; minadaguldol an Dios nin kamurawayan, an Kagurangnan, sa ibabaw nin mga katubigan.

⁴ Mapangyari an tingog nin Kagurangnan, an tingog nin Kagurangnan pano nin kamurawayan.

⁵ Mga sedro binabari kan tingog nin Kagurangnan; mga sedro nin Lebanon binabari nin Kagurangnan.

⁶ Pinapalukso niya an kabukidan nin Lebanon siring sa ogbon na baka; siring sa torilyong baka an Bukid nin Hermon.

⁷ An tingog nin Kagurangnan nakakapaluwas nin mga kikilat.

⁸ An tingog nin Kagurangnan nakakapalinog kan desyerto; an Kagurangnan nakakapalinog kan desyerto nin Kades.

⁹ An tingog nin Kagurangnan nakakatanyog kan mga hamurawon; nakakaparakdag kan mga dahon sa kadlagan; asin sa saiyang Templo an gabos nagkukurahaw, “Kamurawayan!”

¹⁰ An baha pinaghahadean nin Kagurangnan. An Kagurangnan hade sagkod pa man.

¹¹ Kosog itao logod nin Kagurangnan sa saiyang banwaan! Bendisyonan logod niya sinda nin katoninongan!