Salmo 21 - Marahay na Bareta Biblia

Pag-omaw huli sa Panggana

¹ Sa saimong kosog nag-oogma an hade, O Kagurangnan; naoogma huli sa tabang na itinao mo saiya.

² Itinao mo saiya an kamawotan nin saiyang puso; dai mo sinayumahan an kahagadan nin saiyang ngoso.

³ Sinabat mo siya dara an dakul na biyaya; koronang bulawan ibinugtak mo sa saiyang payo.

⁴ Naghagad siya nin buhay, ini itinao mo; halawig na buhay asin daing kataposan.

⁵ Dakula an saiyang kamurawayan huli kan saimong tabang; tinawan mo siya nin kabantogan saka kapangyarihan.

⁶ Bendisyon iwinaras mo saiya sagkod pa man; pinaogma mo huli kan saimong presensya.

⁷ An hade nagsasarig sa Kagurangnan; huli kan danay na pagkamoot nin Kagurangnan, dai siya matatanyog.

⁸ Dadakopon kan hade an gabos niyang kaiwal; dadakopon niya an mga naoongis saiya.

⁹ Gigibohon niya sindang arog sa naglalaad na horno sa pag-abot niya. Hahalonon sinda nin Kagurangnan sa saiyang kaanggotan asin kalayo an matunaw sainda.

¹⁰ Mayo nin matatada sa saindang kapagarakian; sinda gabos gagadanon kan hade.

¹¹ Kun magplano sinda nin maraot tumang saiya, o magmawot nin karibokan, mayo nin mangyayari sa mga iyan.

¹² Sinda saiyang papanaon; sinda saiyang pasisibogon asin padudulagon.

¹³ Inoomaw mi ika, Kagurangnan, huli kan saimong dakulang kosog! Aawiton asin oomawon nyamo an saimong kapangyarihan.