Salmo 19 - Marahay na Bareta Biblia

An Kamurawayan nin Dios sa Saiyang mga Linalang

¹ An kamurawayan nin Dios ibinabareta kan kalangitan! An saiyang gibo irinurukyaw kan kaitaasan!

² An lambang aldaw minapahayag kaini sa masunod na aldaw; an lambang banggi minapahayag man kaini sa masunod na banggi.

³ Mayo nin diskurso o tataramon na ginagamit; mayo nin tingog na nadadangog;

⁴ alagad nakakalakop sa bilog na kinaban an saindang tingog, sagkod sa mga poro kan daga iyan nadadangog. An Dios naggibo nin tolda sa langit para sa aldaw;

⁵ ini minaluwas pagkaaga siring sa nobyong maogma, siring sa paradalagan na andam sa karera.

⁶ Minasirang an aldaw sa sarong poro kan kalangitan, dangan minasolnop sa ibong na poro. Mayo nin makakatago sa saiyang init.

An Katogonan nin Kagurangnan

⁷ An Katogonan nin Kagurangnan mayo nin kulang; nagtataong buhay sa kalag. An mga pagboot nin Kagurangnan masasarigan, nagtataong kadonongan sa mangmang.

⁸ Matanos gabos an mga togon nin Kagurangnan, sa puso nagtatao nin kaogmahan. An mga pagboot nin Kagurangnan dalisay, minatao nin liwanag sa isip.

⁹ Marahay an paggalang sa Kagurangnan; magdadanay iyan sagkod lamang. Totoo an mga hatol nin Kagurangnan; matanos an gabos na iyan.

¹⁰ Orog pang minamawot ki sa bulawan, ki sa purong bulawan; orog na mahamis ki sa dugos, asin sa mga tagdo nin anira.

¹¹ Huli kan saimong mga pagboot, an saimong sorogoon napapatanidan; igwa nin dakulang balos an pagkuyog kan mga iyan.

¹² Alagad siisay an nakakasabot kan sadiring mga kasalan? Linigi ako sa mga hilom na karatan!

¹³ Ligtasan man ako, sa mga tuyong kasalan; hare pagtugot na maghade sako an mga iyan. Dangan ako magigin dalisay asin ligtas sa karatan nin kasalan.

¹⁴ An mga itinaram nin sakong ngoso asin an kaisipan kan sakong puso maako mo logod, O Kagurangnan, sakuyang pailihan, asin sakuyang paratubos!