Salmo 18 - Marahay na Bareta Biblia

An Awit nin Kapangganahan ni David

¹ Namomotan taka, O Kagurangnan, sakong kosog!

² An Kagurangnan iyo an sakong parasurog; sakong pailihan, sakong paratubos. An sakong Dios, gapo na sakong pailihan; sakong kalasag, sakong katabang, sakong bantayan.

³ Minaapod ako sa Kagurangnan, asin iliniligtas niya ako sa sakong mga kaiwal. Pag-omawon an Kagurangnan!

⁴ Napalibotan ako kan mga pisi nin kagadanan; duminagsa sako an mga alon nin pagkaraot.

⁵ Naporopotan ako kan mga pisi nin Sheol, asin nakaatubang sako an mga siod nin kagadanan.

⁶ Sa sakong kasakitan nag-apod ako sa Kagurangnan; nag-apod ako sa sakong Dios tanganing tabangan. Nadangog niya an sakong tingog sa saiyang templo; nakaabot sa saiyang pandangog an sakong inagrangay.

⁷ Dangan nagtakig asin natanyog an daga; nagtakig asin natanyog man an mga pundasyon kan kabukidan, huli ta naanggot an Dios.

⁸ Aso nagluwas hale sa saiyang dungo, nanghahalon na kalayo saka naglalaad na baga hale sa saiyang ngoso.

⁹ Binuka niya an kalangitan dangan siya huminilig; maitom na panganoron nasa irarom kan saiyang mga bitis.

¹⁰ Nagsakay siya sa kerubin asin naglayog; marikas siyang naglayog sakay sa mga pakpak kan doros.

¹¹ Ginibo niyang pantahob an kadikloman; napalibotan siya nin mahibog na mga dampog na pano nin tubig.

¹² Hale sa kikilat sa atubangan niya, nagtunga an mga yelong garo gapo, asin mga laad nin kalayo, dangan naglagbas sa maitom na mga panganoron.

¹³ An Kagurangnan nagdaguldol sa kalangitan; asin nadangog an tingog kan Kahorohalangkawe.

¹⁴ Nagpana siya asin nagkawararak an saiyang mga kaiwal; pinakikilat niya asin nagdurulag sinda.

¹⁵ Dangan nahiling an kairaroman nin kadagatan, asin nahayag an mga pundasyon kan kinaban, kan tuyawon mo an saimong mga kaiwal, Kagurangnan, asin kurahawan sinda sa kaanggotan.

¹⁶ Hale sa itaas, ginawagaw ako nin Kagurangnan asin kinapotan; hinawas niya ako sa hararom na katubigan.

¹⁷ Ilinigtas niya ako sa makosog kong mga kaiwal, asin sa gabos na naanggot sakuya; huli ta dai ko kaya an kosog ninda.

¹⁸ Nagsalakay sinda kan ako nasa kasakitan, alagad iningatan ako nin Kagurangnan.

¹⁹ Tinabangan niya akong makahale sa pag-alaman; ilinigtas niya ako huli ta ako saiyang nawilihan.

²⁰ Binalosan ako nin Kagurangnan sosog sa sakuyang katanosan; benendisyonan niya ako huli ta mayo ako nin kasalan.

²¹ Kinuyog ko an mga togon nin Kagurangnan; an sakuyang Dios dai ko tinalikodan.

²² An gabos niyang togon sakuyang inotob; dai ko linapas an saiyang mga kabotan.

²³ Ako nagin matanos sa saiyang atubang, asin linikayan ko an gabos na kasalan.

²⁴ Kaya binalosan ako nin Kagurangnan sosog sa sakuyang katanosan; huli ta aram niya na ako mayo nin kasalan.

²⁵ Kagurangnan, maimbod ka sa mga maimbod saimo; matanos ka sa mga matanos saimo.

²⁶ Mabini ka sa mga tawong mabini, alagad makuri ka sa mga tawong maraot.

²⁷ Iliniligtas mo an mga mapakumbaba, alagad an mga mapaabaw-abaw saimong ibinababa.

²⁸ Kagurangnan, tinatawan mo ako nin liwanag; hinahale mo an sakong diklom.

²⁹ Huli sa saimo, maroronot ko an sarong hukbo; huli sa sakong Dios, malulukso ko an saindang kudal.

³⁰ An Dios na ini—marahayon an mga gibo! An saiyang mga panuga totoong masasarigan! Siya an kalasag nin gabos na minapaataman saiya.

³¹ Huli ta siisay an Dios kundi an Kagurangnan? Siisay an gapo kundi an satuyang Dios?

³² Siya an Dios na minatao nin kosog sa sako, minapatiwasay kan sakong dalan.

³³ Ginibo niya akong maingat sa paglakaw arog sa usa; pinangagin niya akong ligtas sa ibabaw nin kabukidan.

³⁴ Tinutukdoan niya ako para sa gera, nganing mabingat ko an bronseng pana.

³⁵ Kagurangnan, itinao mo sako an kalasag nin saimong kaligtasan; sinurog ako kan too mong kamot, asin pinangagin dakula kan saimong tabang.

³⁶ Tinawan mo ako nin mahiwas na lugar na lalakawan, asin an sakong mga bitis dai nadalinas.

³⁷ Linamag asin inabot ko an sakong mga kaiwal; dai ako nag-ontok sagkod na sinda nagkagaradan.

³⁸ Ginadan ko sinda, asin dai na nakabangon; natumba sinda sa sakong atubang.

³⁹ Pinakosog mo ako sa pakikilaban; an mga kaiwal ko tinumba mo sa sakong pamitisan.

⁴⁰ Pinadulag mo an sakuyang mga kalaban; an mga naoongis sako sakuyang ginadan.

⁴¹ Sinda nag-agrangay alagad mayong nagligtas; nag-apod sinda sa Kagurangnan, alagad dai niya sinda sinimbag.

⁴² Rinonot ko sinda, kaya nagin sindang arog sa alpog na ipinapadpad kan doros; tinimaktimakan ko sinda siring sa laboy sa mga tinampo.

⁴³ Ilinigtas mo ako sa mga tawong masombikal; ginibo mo akong hade nin mga nasyon; banwaan na dai ko man midbid naglingkod sako.

⁴⁴ Mga dayuhan nagduruko sa atubangan ko; kan madangog ninda ako, nagkuyog sinda sako.

⁴⁵ Pinanruluya an saindang boot, asin tinatakigan na nagruluwas sa saindang mga bantayan.

⁴⁶ An Kagurangnan buhay! Pag-omawon an sakong parasurog! Irukyaw an kadakulaan nin Dios na nagligtas sako.

⁴⁷ Tinawan niya ako nin kapangganahan tumang sa sakong mga kalaban; pinasakop niya sako an mga nasyon,

⁴⁸ asin ilinigtas niya ako sa sakuyang mga kaiwal. Kagurangnan, pinapanggana mo ako tumang sa sakuyang mga kaiwal, asin ilinigtas mo ako sa mga madahas na tawo.

⁴⁹ Kaya, Kagurangnan, oomawon taka sa tahaw nin mga nasyon; maawit ako nin mga pag-omaw saimo.

⁵⁰ Darakulang panggana itinatao niya sa saiyang hade, danay na pagkamoot an ipinapahiling niya sa saiyang linahidan, ki David asin sa kapagarakian kaini sagkod pa man.