Salmo 17 - Marahay na Bareta Biblia

Pamibi nin Sarong Tawong Matanos

¹ Hinanyoga, Kagurangnan, an sakong pakimaherak para sa katanosan; himatea an sakuyang inagrangay! Dangoga an sakong pamibi, na gikan sa ngoso na mayo nin daya.

² Mahukom ka pabor sako, huli ta nahihiling mo an matanos.

³ Kun baloon mo an sakong puso, kun dalawon mo ako pagbanggi, kun baloon mo ako, mayo kang makukuang karatan sako. Dai nagkasala an sakuyang ngoso,

⁴ bakong arog kan ibang mga tawo. Kinuyog ko an pagboot mo; an dalan nin kadahasan linikayan ko.

⁵ Danay akong naglakaw sa saimong mga dalan, an sakong mga bitis dai lamang nasala.

⁶ Namimibi ako saimo, O Dios, huli ta dadangogon mo ako; hilinga ako, hinanyoga an sakong mga tataramon.

⁷ Ipahiling mo an danay mong pagkamoot, O paraligtas sa mga kaiwal kan mga nagpapaili sa too mong kamot.

⁸ Ingati ako siring sa alinawnaw kan saimong mata; sa lindong kan saimong mga pakpak ako tagoa;

⁹ sa kamot kan mga kaiwal ako agawa. Ako napapalibotan kan makangirhat na kalaban;

¹⁰ mayo sinda nin pagkaherak; mapaabaw-abaw sindang nagtataram.

¹¹ Ako ngunyan saindang napapalibotan, yaon sinda saen man ako mag-atubang; naghahalat kan tamang panahon nganing ako magadan.

¹² Naghahalat sinda sako na garong mga leon, naghahalat nganing ako ronoton.

¹³ Madya, Kagurangnan, atubanga asin daoga sinda! Sa mga maraot ligtasan ako kan saimong espada;

¹⁴ ligtasan ako kan saimong kamot, Kagurangnan, sa mga tawo na an kabtang sa buhay yaon digdi sa kinaban. Padusahan mo sinda kan mga pasakit na saimong inandam. May matada pa logod para sa saindang kaakian, asin para sa saindang kapagarakian.

¹⁵ Para sako, mahihiling ko sa katanosan an saimong lalawogon; pagmata ko dangan mahiling ka, mayo na akong ibang mamawoton.