Salmo 150 - Marahay na Bareta Biblia

Omawon an Kagurangnan !

¹ Omawon an Kagurangnan! Omawon an Dios sa saiyang Templo! Omawon siya sa saiyang pusog na kalangitan!

² Omawon siya huli kan saiyang mga gibong ngangalasan, omawon an saiyang mayong kapantay na kadakulaan.

³ Omawon siya sa tanog nin trompeta; omawon siya sa lira asin sa arpa.

⁴ Omawon siya sa tamborin asin sa pagsayaw; omawon siya sa gitara asin sa plawta.

⁵ Omawon siya sa mga gimbal, omawon sa matanog na mga gimbal.

⁶ Omawon nindo an Kagurangnan, gabos na nabubuhay na linalang! Omawon an Kagurangnan!