Salmo 15 - Marahay na Bareta Biblia

An Hinahagad nin Dios

¹ Kagurangnan, siisay an pwedeng maglaog sa saimong Templo? Siisay an pwedeng magsamba sa Sion, an banal mong bulod?

² An makinuyog-kuyog sa Dios sa gabos na bagay asin naggigibo nin katanosan, an nagtataram nin katotoohan

³ asin dai nagbabalobagi. Dai siya naggigibo nin maraot sa saiyang katood, ni nagdadara nin salang bareta dapit sa saiyang kataed.

⁴ Ikinakaongis niya an mga isinisikwal nin Dios, alagad ginagalangan niya an mga may pagkatakot sa Kagurangnan. Inootob niya an saiyang panuga anoman an mangyari.

⁵ Dai siya nagpapautang na may patubo, asin dai nagpapasuhol tumang sa mayo nin sala. An naggigibo kan mga bagay na ini dai nanggad matatanyog.