Salmo 148 - Marahay na Bareta Biblia

Pag-apod sa Mga Linalang Tanganing Omawon an Dios

¹ Omawon an Kagurangnan! Omawon an Kagurangnan sa kalangitan, omawon siya sa kaitaasan.

² Omawon nindo siya, gabos na anghel niya, omawon nindo siya, gabos niyang mga hukbo.

³ Omawon nindo siya, aldaw asin bulan; omawon nindo siya, mga bitoon na maliwanag.

⁴ Omawon nindo siya, kamong mga langit na halangkawon; asin kamong mga tubig sa ibabaw kan kalangitan.

⁵ Omawon logod ninda an ngaran nin Kagurangnan! Huli ta nagboot siya, asin sinda nalalang.

⁶ Nagboot siya na mamugtak sinda sa saindang mga lugar sagkod pa man, asin dai ninda pwedeng lapason iyan.

⁷ Hale sa daga omawon nindo an Kagurangnan; kamong nabubuhay sa dagat asin kamong mga kairaroman.

⁸ Kalayo asin uran, yelo asin mga panganoron, omawon nindo an Kagurangnan; asin kamong makokosog na doros na minakuyog kan saiyang tataramon.

⁹ Omawon nindo siya, mga bulod asin mga bukid, mga kahoy na nagbubunga asin mga sedro;

¹⁰ mga hayop na maringis asin magaro, mga hayop na nagkakamang asin mga gamgam na naglalayog!

¹¹ Omawon nindo siya, mga hade asin gabos na banwaan, mga prinsipe asin gabos na pamayo kan kinaban;

¹² mga soltero asin mga daraga, mga gurang na lalaki asin mga aki.

¹³ Omawon nindo an ngaran nin Kagurangnan, huli ta an ngaran niya iyo sana an dakula; an kamurawayan niya halangkaw pa sa langit asin sa daga.

¹⁴ Pinakosog niya an saiyang nasyon, kaya inoomaw siya kan saiyang mga banal, kan banwaan nin Israel na saiyang namomotan. Omawon an Kagurangnan!