Salmo 147 - Marahay na Bareta Biblia

Pag-omaw sa Dios na Makakamhan

¹ Omawon an Kagurangnan! Marahay an mag-awit nin pag-omaw sa satong Dios; siya maugayon, kaya maninigong omawon.

² Pinapatindog nin Kagurangnan an Jerusalem; ibinabalik niya an mga nabihag na Israelita.

³ Binobolong niya an mga pusong naraot, an mga lugad ninda saiyang binubugkos.

⁴ Aram niya an bilang kan mga bitoon, lambang saro inaapod niya sa sadiring ngaran.

⁵ An satong Kagurangnan dakula asin makakamhan; dai masusukol an saiyang kadonongan.

⁶ Binabangon nin Kagurangnan an mga dukha, alagad an tampalasan rinoronot niya sa daga.

⁷ Mga awit nin pasalamat awiton sa Kagurangnan; tumugtog sa lira para sa satuyang Dios.

⁸ An langit tinatahoban niya nin mga panganoron, inaandam niya an uran para sa daga, pinapatalubo niya an mga doot sa kabubuldan.

⁹ Kakanon itinatao niya sa mga hayop asin sa mga ogbon na uwak na minaapod saiya.

¹⁰ An saiyang kaogmahan dai nasa makosog na mga kabayo, ni sa maisog na mga soldados;

¹¹ kundi nawiwilihan nin Kagurangnan an mga may pagkatakot saiya, an mga minasarig sa danay niyang pagkamoot.

¹² Omawon mo an Kagurangnan, O Jerusalem! Omawon mo an saimong Dios, O Sion!

¹³ Huli ta pinapakosog niya an mga trangkahan mo; benebendisyonan niya an mga kaakian mo.

¹⁴ Pinapatoninong niya an mga pagdolonan mo; marahay na trigo an ipinapakakan niya saimo.

¹⁵ Minatao siya nin pagboot sa daga, asin an saiyang tataramon tolos sinusunod.

¹⁶ Nyebeng arog kan lana an itinatao niya; ambon siring sa abo na iwinawarak niya.

¹⁷ Pinapauran niya an mga yelo na arog kan mga graba; siisay an makakatagal sa lipot na saiyang ipinapadara?

¹⁸ Dangan minatao siya nin pagboot asin an yelo natutunaw; ipinapadara niya an doros, asin an tubig minabulos.

¹⁹ An saiyang tataramon ipinapahayag niya ki Jacob, ki Israel an saiyang mga togon asin pagboot.

²⁰ Dai niya iyan ginigibo sa ibang nasyon; an mga ini mayo nin pakaisi kan saiyang kabotan. Omawon an Kagurangnan!