Salmo 141 - Marahay na Bareta Biblia

Pamibi sa Pagkabanggi

¹ Nag-aapod ako saimo, Kagurangnan, paghumare sa pagtabang sako! Dangoga ako kun minaapod ako saimo!

² Akoon mo an sakong pamibi siring sa insenso; asin an initaas kong mga kamot bilang pamangging atang.

³ Kagurangnan, bugtakan mo nin bantay an sakuyang ngoso; bantayan mo an pintoan nin sakuyang ngabil.

⁴ Likayan an puso ko sa anoman na maraot asin sa paggibo nin mga karatan, kaiba kan mga paragibo nin kasombikalan. Hare ako pagpaayona sa saindang mga pyesta.

⁵ Pwede akong padusahan o sagweon nin tawong matanos sa pagkaherak; alagad dai ako maako nin kaomawan sa kamot kan tampalasan, huli ta danay akong namimibi tumang sa saindang karatan.

⁶ Kun itao na sinda sa mga mapadusa sainda, dangan ninda masasabotan na totoo an tataramon nin Kagurangnan.

⁷ Siring sa kahoy na tinitiak asin binabaak, an saindang mga tolang iwawarak sa ngoso kan Sheol.

⁸ Alagad itinitingkalag ko an sakong mga mata sa saimo, O Kagurangnan Dios, sa saimo ako minapaili; hare ako pagpabayae na mayong masasarigan.

⁹ Likayan ako sa siod na inandam ninda para sako; asin man sa mga litag kan mga naggigibo nin maraot.

¹⁰ An mga tampalasan mahulog logod sa litag na saindang inandam, mantang ako padagos sa sakong paglakaw.