Salmo 140 - Marahay na Bareta Biblia

Pamibi Tanganing Surogon

¹ Ligtasan ako, Kagurangnan, sa mga maraot na tawo; ingati ako sa mga tulisan.

² Danay sindang nag-iisip nin karatan, danay na nagpopoon nin iriwal.

³ Matarom an saindang dila siring kan sa halas; marara an saindang tataramon siring sa kamandag kan kobra.

⁴ Likayan ako, Kagurangnan, sa kamot kan mga tampalasan; ingati ako sa mga tulisan na naghuhumot na ako mapadungkal.

⁵ Mga mapaabaw-abaw nagbugtak nin litag para sako; nagbugtak sinda nin mga siod sa dalan na sakong aagihan.

⁶ Nagsabi ako sa Kagurangnan, “Ika an sakuyang Dios.” Kagurangnan, dangoga an tingog nin sakong pakimaherak!

⁷ Kagurangnan, sakong Kagurangnan, makosog na paraligtas! Sinurog mo ako sa aldaw nin pakilaban.

⁸ Kagurangnan, hare pagtawan an mga kamawotan kan mga tampalasan; hare papangyariha an saindang kaisipan.

⁹ Dai man logod manggana an sakong mga kaiwal; humugpa logod sainda an karatan na saindang itinaram.

¹⁰ Mga nagkakalayong baga humugpa logod sainda; mahulog logod sinda sa kalot asin dai na makahawas.

¹¹ An paralibak dai logod mapamugtak sa daga; abotan logod nin karatan asin magadan an mga tulisan.

¹² Kagurangnan, aram kong tinatabangan mo an mga nasasakitan; asin an mga daing sukat tinatawan mo nin katanosan.

¹³ Oomawon nanggad kan mga matanos an saimong ngaran; asin mag-eerok sinda sa saimong atubang.