Salmo 139 - Marahay na Bareta Biblia

An Gabos Aram nin Dios

¹ Kagurangnan, ako siniyasat mo asin namidbid mo.

² Aram mo kun ako minatukaw o minatindog; nababasa mo sa harayo an gabos kong iniisip.

³ Hinihiling mo kun ako minalakaw o minahigda; aram mo an gabos kong mga gibo.

⁴ Bago ko ikataram an anoman, O Kagurangnan, aram mo na iyan.

⁵ Yaon ka sa sakong likodan asin enotan; sinusurog mo ako kan saimong kapangyarihan.

⁶ An kadonongan mo halangkaw para sako, dai maabot kan sakong pag-isip.

⁷ Saen ako maduman harayo sa saimong Espiritu? Saen ako madulag harayo sa saimo?

⁸ Sumakat man ako sa langit, yaon ka duman; humigda man ako sa lulubngan, yaon ka giraray.

⁹ Lumayog man ako pasiring sa sirangan; o mag-erok sa pinakaharayong lugar kan solnopan,

¹⁰ maski duman papangenotan mo ako, aantabayan kan too mong kamot.

¹¹ Kun sabihon ko, “Itago logod ako kan diklom, asin an liwanag sa palibot ko magin banggi,”

¹² alagad para saimo, an diklom bakong madiklom, asin an banggi maliwanag siring sa aldaw. Para saimo, an diklom pareho sana sa liwanag.

¹³ Ika an naglalang sako; hinaman mo ako sa tulak nin sakong ina.

¹⁴ Inoomaw taka huli ta maninigo kang galangan. Ngangalasan an gabos mong gibo; midbid mo nanggad an buhay ko.

¹⁵ Kan an sakong mga tolang hinahaman, maingat na binibilog sa tulak kan sakong ina; kan hilom akong nagtatalubo duman— aram mo nang yaon ako duman.

¹⁶ Nahiling mo na ako bago ako namundag. An mga aldaw na talaan para sako nakasurat na sa saimong libro, bago pa lamang poonan an arin man kaiyan.

¹⁷ O Dios, misteryo para sako an saimong mga kaisipan, dakul saka dai mabilang!

¹⁸ Labi pa iyan sa mga baybay kun bilangon ko. Kan ako magimata, nasa kaibahan mo pa ako.

¹⁹ O Dios, gadanon mo logod an mga maraot; rumayo logod sako an mga napapaha sa dugo.

²⁰ Minataram sinda nin maraot tumang saimo; minataram nin maraot tumang sa ngaran mo.

²¹ Kagurangnan, anggot ako sa mga naaanggot saimo; naoongis ako sa mga minatumang saimo.

²² Naglalaad nanggad an kaanggotan ko sainda; ibinibilang ko sinda na mga kaiwal.

²³ Siyasata ako, O Dios, asin midbida an sakong puso; baloa ako asin midbida an mga kaisipan ko.

²⁴ Hilinga kun igwa nin karatan, asin daraha ako sa dalan na daing kasagkoran.