Salmo 136 - Marahay na Bareta Biblia

Awit nin Pasasalamat

¹ Magpasalamat kamo sa Kagurangnan, huli ta siya marahayon; an saiyang pagkamoot mayo nin kataposan.

² Magpasalamat kamo sa Dios nin mga dios; an saiyang pagkamoot mayo nin kataposan.

³ Magpasalamat kamo sa Kagurangnan nin mga kagurangnan; an saiyang pagkamoot mayo nin kataposan.

⁴ Siya sana an nakakagibo nin darakulang ngangalasan; an saiyang pagkamoot mayo nin kataposan.

⁵ An mga langit linalang niya sa saiyang kadonongan; an saiyang pagkamoot mayo nin kataposan.

⁶ An daga itinugdok niya sa ibabaw kan katubigan; an saiyang pagkamoot mayo nin kataposan.

⁷ Ginibo niya an dakulang mga ilaw; an saiyang pagkamoot mayo nin kataposan;

⁸ an aldaw tanganing magtao nin liwanag sa bilog na aldaw; an saiyang pagkamoot mayo nin kataposan;

⁹ an bulan asin an mga bitoon tanganing magtao nin liwanag sa banggi; an saiyang pagkamoot mayo nin kataposan.

¹⁰ Mga panganay sa Egipto saiyang ginadan; an saiyang pagkamoot mayo nin kataposan.

¹¹ Ilinuwas niya an Israel hale sa Egipto; an saiyang pagkamoot mayo nin kataposan;

¹² huli kan saiyang makosog na kamot, asin mapangyaring takyag; an saiyang pagkamoot mayo nin kataposan.

¹³ Binanga niya an Dagat na Pula; an saiyang pagkamoot mayo nin kataposan;

¹⁴ an saiyang banwaan pinaagi niya sa tahaw kaiyan; an saiyang pagkamoot mayo nin kataposan;

¹⁵ alagad an Faraon asin an hukbo kaini linamos niya duman; an saiyang pagkamoot mayo nin kataposan.

¹⁶ An saiyang banwaan pinangenotan niya sa kalangtadan; an saiyang pagkamoot mayo nin kataposan.

¹⁷ Mapangyaring mga hade saiyang ginaradan; an saiyang pagkamoot mayo nin kataposan;

¹⁸ bantog na mga hade saiyang ginaradan; an saiyang pagkamoot mayo nin kataposan;

¹⁹ si Sihon, hade kan mga Amoreo; an saiyang pagkamoot mayo nin kataposan;

²⁰ asin si Og, hade nin Basan; an saiyang pagkamoot mayo nin kataposan.

²¹ An saindang daga itinao niya bilang pamana; an saiyang pagkamoot mayo nin kataposan;

²² pamana ki Israel na saiyang sorogoon; an saiyang pagkamoot mayo nin kataposan.

²³ Siya an nakagiromdom kan kita nagkadaraog; an saiyang pagkamoot mayo nin kataposan;

²⁴ ilinigtas niya kita sa satong mga kaiwal; an saiyang pagkamoot mayo nin kataposan.

²⁵ Siya an nagtatao nin kakanon sa gabos na nabubuhay; an saiyang pagkamoot mayo nin kataposan.

²⁶ Magpasalamat kamo sa Dios nin langit; an saiyang pagkamoot mayo nin kataposan.