Salmo 135 - Marahay na Bareta Biblia

Awit nin Pag-omaw

¹ Omawon an Kagurangnan! Omawon an ngaran nin Kagurangnan, omawon nindo, mga sorogoon nin Kagurangnan,

² na naglilingkod sa harong nin Kagurangnan, na yaon sa mga patyo kan harong nin satong Dios.

³ Omawon an Kagurangnan, huli ta siya marahayon; mag-awit nin mga pag-omaw sa saiyang ngaran, huli ta siya maugayon.

⁴ Pinili nin Kagurangnan si Jacob para saiya, si Israel bilang rogaring niya.

⁵ Aram kong dakula an satong Kagurangnan, mas dakula ki sa gabos na dios-dios.

⁶ Ginigibo niya an anoman na saiyang nawiwilihan, sa langit asin sa daga, sa kadagatan asin sa gabos na kairaroman.

⁷ Siya an nagpapaitaas kan mga panganoron hale sa mga poro kan daga; an naggigibo nin kikilat para sa uran, asin an nagpapaluwas kan mga doros hale sa saiyang mga sarayan.

⁸ Siya an guminaradan kan mga panganay sa Egipto, mga panganay nin tawo asin hayop.

⁹ Mga milagro saka ngangalasan ginibo niya duman, tanganing padusahan an hade asin an gabos na opisyal kaini.

¹⁰ Rinumpag niya an dakul na nasyon asin ginadan an mapangyaring mga hade:

¹¹ Si Sihon, hade kan mga Amoreo, si Og, hade nin Basan, asin an gabos na hade sa Canaan.

¹² An saindang daga itinao niya bilang pamana, pamana nin Israel na saiyang banwaan.

¹³ Kagurangnan, an ngaran mo magdadanay sagkod pa man, an kabantogan mo sa gabos na panahon.

¹⁴ Susurogon nin Kagurangnan an saiyang banwaan; mga sorogoon niya saiyang maheherakan.

¹⁵ An mga dios-dios kan mga nasyon gibo sa plata asin bulawan, gibo kan mga kamot nin katawohan.

¹⁶ Igwang mga ngoso, alagad dai nakakataram; igwang mga mata, alagad dai nakakahiling.

¹⁷ Igwang mga talinga, alagad dai nakakadangog; mayo nin hinangos sa saindang mga ngoso.

¹⁸ An naggibo sainda magin arog logod sainda; siring man an gabos na minasarig sainda!

¹⁹ Banwaan nin Israel, mag-omaw ka sa Kagurangnan; mga aki ni Aaron, mag-omaw kamo sa Kagurangnan!

²⁰ Mga aki ni Levi, mag-omaw kamo sa Kagurangnan; kamo na may pagkatakot sa Kagurangnan, mag-omaw kamo saiya.

²¹ Hale sa Sion omawon an Kagurangnan, na nag-eerok sa Jerusalem! Omawon an Kagurangnan!