Salmo 132 - Marahay na Bareta Biblia

Pag-omaw kan Templo

¹ Kagurangnan, giromdoma si David asin an gabos na sakit na saiyang tinios.

² Giromdoma, Kagurangnan, an saiyang sumpa, an panuga na ginibo niya saimo, Makakamhan na Dios ni Jacob.

³ “Dai ako mapuli sa sakong harong ni mapahingalo sa sakong higdaan;

⁴ dai ako mapahingalo o makatorog,

⁵ sagkod na makakua ako nin lugar para sa Kagurangnan, sarong harong para sa Makakamhan na Dios ni Jacob.”

⁶ Sa Betlehem nabaretaan mi an manongod sa Kaban nin Tipan, asin nakua mi ini sa kaomahan nin Jearim.

⁷ Kami nagsabi, “Dumuman kita sa harong nin Kagurangnan; magsamba kita sa atubangan kan saiyang trono.”

⁸ Kagurangnan, lumaog ka sa lugar na saimong pinagpapahingaloan, kaiba an Kaban nin Tipan, na tanda kan saimong kapangyarihan.

⁹ An saimong mga padi magubingan logod nin katanosan; an saimong mga banal magkurahaw logod sa kaogmahan!

¹⁰ Huli ki David na saimong sorogoon hare pagsikwalan an hade na saimong linahidan.

¹¹ Sarong panuga an ginibo mo ki David panuga na dai mo babawion: “Saro sa mga aki mo an gigibohon kong hade; siya maghahade bilang kasalihid mo.

¹² Kun otobon kan mga aki mo an sakuyang tipan, asin an mga pagboot na itatao ko sainda, an saindang mga aki matukaw man sa saimong trono sagkod pa man.”

¹³ Huli ta an Sion pinili nin Kagurangnan; minawot niyang ini an magin saiyang erokan:

¹⁴ “Ini iyo an sakuyang pahingaloan sagkod pa man; digdi ako maerok, huli ta ini an sakong kamawotan.

¹⁵ Dakulang bendisyon an itatao ko sa Sion, an saiyang mga dukha babasogon ko sa kakanon.

¹⁶ An saiyang mga padi gugubingan ko nin kaligtasan, asin an saiyang mga banal makurahaw sa kaogmahan.

¹⁷ Saro sa mga aki ni David an gigibohon kong dakulang hade sa Sion; papadanayon ko digdi an pagkanihade kan sakong pinili.

¹⁸ An mga kaiwal niya gugubingan ko nin kasopogan, alagad sa saiyang payo, an saiyang korona magkikinang.”