Salmo 128 - Marahay na Bareta Biblia

An Balos sa Pagkuyog sa Kagurangnan

¹ Paladan an tawong may pagkatakot sa Kagurangnan; na naglalakaw sa saiyang mga dalan.

² Kakakanon mo an bunga kan saimong kapagalan; magigin maogma ka asin magkakaigwa nin kauswagan.

³ An saimong agom makakaarog sa ubas na namumunga sa laog nin saimong harong, asin an saimong kaakian makakaarog sa sadit pang mga kahoy na oliba sa palibot kan saimong lamesa.

⁴ Siring kaiyan kapaladan an tawong natatakot sa Kagurangnan.

⁵ Bendisyonan ka logod nin Kagurangnan hale sa Sion! Mahiling mo logod an pag-uswag nin Jerusalem sa bilog mong pagkabuhay!

⁶ Mahiling mo logod an mga aki kan saimong kaakian! An katoninongan mapasa-Israel!