Salmo 126 - Marahay na Bareta Biblia

Pamibi Tanganing Iligtas

¹ Kan ibalik nin Kagurangnan an kayamanan nin Sion, nakabaing kita sa mga nangatorogan!

² Dangan napano kita nin kaogmahan, nag-awit sa kagayagayahan. Dangan nagsabi an ibang nasyon manongod sato, “Dakulang mga bagay an ginibo sainda nin Kagurangnan.”

³ Dakulang mga bagay an ginibo niya para sato, kaya kita maogma!

⁴ Tawe kami giraray nin kauswagan, Kagurangnan, siring na an uran nagtatao nin tubig sa mamarang mga salog.

⁵ An mga minasabwag na nagluluha, mag-ani logod na maogma.

⁶ An mga naghihibi mantang minaluwas dara an mga banhi na isasabwag, mabalik na nag-aawit sa kaogmahan, dara an saindang inani.