Salmo 122 - Marahay na Bareta Biblia

Pag-omaw sa Jerusalem

¹ Ako naogma kan ako saindang sabihan, “Dumuman kita sa harong nin Kagurangnan.”

² Uya na kami ngunyan, nakatindog sa may trangkahan mo, O Jerusalem!

³ An Jerusalem pinatugdok bilang sarong syudad na masarig.

⁴ Duman minaturukad an mga tribu, an mga tribu nin Kagurangnan, tanganing duman magpasalamat sa Kagurangnan sosog sa togon na itinao niya sa Israel.

⁵ Duman ibinugtak an mga trono sa paghukom, an mga trono kan mga hade nin Israel.

⁶ Ipamibi nindo an katoninongan nin Jerusalem! “Mag-uswag logod an mga namomoot saimo.

⁷ Magkaigwa logod nin katoninongan sa laog nin saimong mga kudal, asin katiwasayan sa saimong mga bantayan!”

⁸ Huli sa mga tugang ko asin mga kairiba, ako minasabi sa Jerusalem, “An katoninongan mapasaimo!”

⁹ Huli sa harong nin Kagurangnan na samuyang Dios, ipapamibi ko an saimong karahayan.