Salmo 121 - Marahay na Bareta Biblia

An Kagurangnan Satong Parasurog

¹ Itinitingkalag ko sa mga bulod an mga mata ko; saen daw magikan an tabang para sako?

² An tabang para sako magikan sa Kagurangnan na naggibo kan langit asin daga.

³ Dai ka niya papabayaan na mahulog; an parabantay mo dai makatorog.

⁴ Dai matungka, dai makatorog an parabantay nin Israel.

⁵ Babantayan ka nin Kagurangnan; yaon siya sa kataed mo tanganing ika ingatan.

⁶ Kun aldaw dai ka mararaot kan init; kun banggi dai ka mararaot kan bulan.

⁷ Ililikay ka nin Kagurangnan sa gabos na pag-alaman; aatamanon niya an saimong buhay.

⁸ Iingatan ka nin Kagurangnan sa saimong paghale asin pagbalik ngunyan asin sagkod pa man.