Salmo 118 - Marahay na Bareta Biblia

Pamibi nin Pasalamat para sa Kapangganahan

¹ Magpasalamat kamo sa Kagurangnan, huli ta siya marahayon; an danay niyang pagkamoot mayo nin kasagkoran!

² Magsabi an banwaan nin Israel, “An danay niyang pagkamoot mayo nin kasagkoran.”

³ Magsabi an mga padi nin Dios, “An danay niyang pagkamoot mayo nin kasagkoran.”

⁴ Magsabi an gabos na nagsasamba saiya, “An danay niyang pagkamoot mayo nin kasagkoran.”

⁵ Sa sakong kahorasaan nag-apod ako sa Kagurangnan; sinimbag niya ako asin pinatalingkas.

⁶ An Kagurangnan kaapil ko, dai ako matatakot; ano an magigibo nin tawo laban sako?

⁷ Kaapil ko an Kagurangnan tanganing tabangan ako; hihilingon ko an pagkadaog kan sakong mga kaiwal.

⁸ Mas marahay an magsarig sa Kagurangnan ki sa maglaom sa tawo.

⁹ Mas marahay an magsarig sa Kagurangnan ki sa maglaom sa mga prinsipe.

¹⁰ Pinalibotan ako nin dakul na kaiwal; alagad ginaradan ko sinda sa ngaran nin Kagurangnan!

¹¹ Pinalibotan ninda ako, alagad ginaradan ko sinda sa ngaran nin Kagurangnan!

¹² Pinalibotan ninda ako siring sa mga putakti, alagad napalsok tolos sinda siring kan kalayo sa katonokan; alagad ginaradan ko sinda sa ngaran nin Kagurangnan!

¹³ Sinalakay ninda ako asin saindang nadadaog, alagad tinabangan ako nin Kagurangnan.

¹⁴ An Kagurangnan iyo an sakong kosog asin awit; siya an sakong nagin kaligtasan.

¹⁵ Dangoga an maogmang kinurahaw nin kapangganahan sa mga tolda kan mga matanos: “An kapangyarihan nin Kagurangnan an naggibo kaini!

¹⁶ An kapangyarihan nin Kagurangnan an nagdara sato nin kapangganahan— an saiyang kapangyarihan sa gera!”

¹⁷ Dai ako magagadan, ata ngani mabubuhay asin irurukyaw ko an gibo nin Kagurangnan.

¹⁸ Pinadusahan niya ako nin makuri, alagad dai niya ako itinugot na magadan.

¹⁹ Buksan nindo para sako an mga trangkahan kan Templo, tanganing maglaog ako asin magpasalamat sa Kagurangnan!

²⁰ Iyo ini an trangkahan nin Kagurangnan; an mga matanos sana an makakalaog diyan.

²¹ Nagpapasalamat ako saimo huli ta sinimbag mo ako, asin ika an sakong nagin kaligtasan.

²² An gapo na isinikwal kan mga paratugdok iyo an nagin patugmadan na gapo.

²³ Gibo ini nin Kagurangnan; iyan sarong ngangalasan sa satong panghiling!

²⁴ Iyo ini an aldaw na ginibo nin Kagurangnan; mag-ogma kita asin maggagayagaya sa aldaw na ini!

²⁵ Ligtasan kami, Kagurangnan, ligtasan kami! O Kagurangnan, nakikimaherak kami saimo, papangganaha kami!

²⁶ Paladan an minadatong sa ngaran nin Kagurangnan! Magpoon sa Templo nin Kagurangnan, bebendisyonan mi ika.

²⁷ An Kagurangnan iyo an Dios; siya an nagtao sato nin liwanag. Kapot an mga sanga, poonan na nindo an pyesta asin maglibot kamo sa altar.

²⁸ Ika an sakong Dios, asin papasalamatan taka; ipagrurukyaw ko an saimong kadakulaan.

²⁹ Magpasalamat kamo sa Kagurangnan, huli ta siya marahayon; an danay niyang pagkamoot mayo nin kasagkoran.