Salmo 116 - Marahay na Bareta Biblia

Nag-oomaw sa Dios an Tawong Ilinigtas sa Kagadanan

¹ Namomotan ko an Kagurangnan, huli ta dinangog niya an sakong tingog asin mga pakimaherak.

² Dinadangog niya ako, kaya mag-aapod ako saiya sagkod na ako may buhay.

³ Napalibotan ako kan mga siod nin kagadanan; pinugol ako kan kasakitan nin Sheol; napano ako nin takot asin kahandalan.

⁴ Dangan nag-apod ako sa Kagurangnan, “Nakikimaherak ako saimo, Kagurangnan, ligtasan an sakong buhay!”

⁵ An Kagurangnan maugayon asin matanos; maheherakon an satong Dios.

⁶ Iniingatan nin Kagurangnan an mga mayong sukat; kan ako nasa pag-alaman, ako saiyang ilinigtas.

⁷ Pagbalik, O kalag ko, sa saimong kapahingaloan; huli ta nagin marahayon sa saimo an Kagurangnan.

⁸ Ilinigtas ako nin Kagurangnan sa kagadanan; pinahid niya an sakong mga luha, asin ilinikay an mga bitis ko sa pagkasingkog.

⁹ Kaya naglalakaw ako sa atubang nin Kagurangnan sa daga kan mga nabubuhay.

¹⁰ Padagos akong nagtubod, dawa ngani ako nagsabi, “Makuri an sakong pagtios,”

¹¹ maski kan ako natakot asin nagsabi, “Mayo nang tawong masasarigan.”

¹² Ano an pwede kong idolot sa Kagurangnan huli kan gabos niyang karahayan sako?

¹³ Iiitaas ko an kalis nin kaligtasan, asin aapodon an ngaran nin Kagurangnan.

¹⁴ Ootobon ko an sakong mga panuga sa Kagurangnan, sa atubangan kan bilog niyang banwaan.

¹⁵ Makulog para sa Kagurangnan kun nagagadan an saro kan saiyang mga banal!

¹⁶ Sorogoon mo ako, Kagurangnan; sorogoon mo ako, na aking lalaki kan babae mong oripon. Ako pinatalingkas mo.

¹⁷ Idodolot ko saimo an sakripisyo nin pasasalamat, asin aapodon ko an ngaran mo.

¹⁸ Ootobon ko an sakong mga panuga sa Kagurangnan, sa atubangan kan bilog niyang banwaan,

¹⁹ sa mga patyo kan harong nin Kagurangnan, sa tahaw mo, O Jerusalem. Omawon an Kagurangnan!