Salmo 114 - Marahay na Bareta Biblia

Awit Para sa Paskwa

¹ Kan an Israel magluwas hale sa Egipto, kan an kapagarakian ni Jacob maghale sa dagang dayuhan,

² an Juda nagin santwaryo nin Kagurangnan, an Israel saiyang nasadirihan.

³ Huminiling an Dagat na Pula asin duminulag; an Salog nin Jordan suminibog.

⁴ An mga bukid luminukso siring sa mga karnero, an mga bulod luminukso siring sa mga kordero.

⁵ Ano an nangyari saimo, O Dagat, ta ika duminulag? Asin ika, O Jordan, ta ika suminibog?

⁶ Kamong mga bukid, tadaw ta luminukso kamo siring sa mga karnero? Kamong mga bulod, ta luminukso kamo siring sa mga kordero?

⁷ Magtakig ka, O daga, sa atubang nin Kagurangnan, sa atubang kan Dios ni Jacob,

⁸ na ginigibong sapa an gapo, asin an mga ampas ginigibong burabod.