Salmo 112 - Marahay na Bareta Biblia

An Kaogmahan nin Matanos na Tawo

¹ Omawon an Kagurangnan! Paladan an tawong may pagkatakot sa Kagurangnan, na naoogma sa pagkuyog kan saiyang mga kabotan.

² Magigin mapangyari sa daga an saiyang mga kapagarakian; an henerasyon nin mga matanos magigin paladan.

³ An saiyang pamilya magigin mayaman, asin siya magigin mauswag sagkod lamang.

⁴ An ilaw minaliwanag sa kadikloman para sa mga marahay na tawo, para sa mga maheherakon, maboot asin matanos.

⁵ Paladan an tawo na matinao asin mapinasubli, na dai nagdadaya sa saiyang negosyo.

⁶ An matanos na tawo dai masasala; gigiromdomon siya sagkod pa man.

⁷ Dai siya natatakot sa maraot na bareta; makosog an saiyang pagtubod asin nagsasarig siya sa Kagurangnan.

⁸ Dai siya nahahandal o natatakot; aram niyang madadaog an saiyang mga kaiwal.

⁹ Maugayon siya sa mga nangangaipo; dai nanggad nasusudya an saiyang pagkamaboot; siya magigin mapangyari asin gagalangan.

¹⁰ Nahihiling ini kan mga maraot asin naaanggot; minaparagot kan saindang mga ngipon dangan minahale; an saindang mga paglaom nawawara sagkod pa man.